काठमाडौँ । नेपाली कांग्रेस सभापति शेरबहादुर देउवाको निवास बुढानीलकण्ठमा बसेको नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेता माधव नेपालबीच बसेको बैठक सकिएको छ ।

बैठकमा प्रदेश २ र सुदूरपश्चिम प्रदेश सरकार विषयमा छलफल भएको छ । देउवाका स्वकीय सचिव भानु देउवाले तीन नेताबीचको बैठक साढे ५ बजे सकिएको जानकारी दिए ।

सत्ताशीन दल एमालेमा पार्टी एकताका लागि प्रधानमन्त्री केपी शर्मा ओलीले आइतबार राति ६ बुँदे प्रस्ताव अगाडि सारेर अपिल गरेपछि नेपाल समूहले के गर्लान् ? भन्ने प्रश्न उठिरहेका बेला नेता नेपाल आफ्नो समूहको स्थायी समितिको बैठक सेकर बुढानीलकण्ठ पुगेका हुन् ।

माओवादी केन्द्रका अध्यक्ष प्रचण्ड बिहान नेपाललाई उनकै निवास कोटेश्वर पुगेर भेट गरी देउवाको निवास पुगेका थिए । देउवासँग झण्डै एक घण्टा छलफल गरेर बाहिरिएका प्रचण्ड त्यसपछि पार्टी कार्यालय कोटेश्वर पेरिसडाँडा पुगेका थिए ।

तर, जब नेपाल पनि आफ्नो समूहको स्थायी समितिको बैठक सकेर देउवा निवास पुगे । त्यसलगत्तै प्रचण्ड दोहोर्‍याएर देउवा निवास पुगेका थिए ।