काठमाडौँ । सुर्खेत जिल्लाको गुर्भाकोट नगरपालिका ११ आँपसोतीको भेरी नदी किनारमा बस्दै आएका राउटे समुदायकी दुई युवती आफ्नै बस्ती (क्याम्प)मा फर्केका छन् । सोही नगरपालिका मेहलकुनाका स्थानीय तीन युवाले उनीहरूलाई मदिरा खुवाएर यौन दुर्व्यवहार गरेका थिए ।

दुई राउटे युवतीलाई यौन दुर्व्यवहार गर्ने ३५ वर्षीय दोमनबहादुर घर्ती मगर, २४ वर्षका भुपेन्द्र बुढा मगर र होटल सञ्चालक २९ वर्षका विनोद पुनलाई प्रहरीले पक्राउ गरिसकेको छ । उनीहरूलाई गत आइतबार नै पक्राउ गरेको जिल्ला प्रहरी कार्यालय सुर्खेतका प्रहरी उपरीक्षक (डिएसपी) रामप्रसाद घर्ती मगरले जानकारी दिए ।

यौन दुर्व्यवहारको भिडियो सार्वजनिक भएसँगै प्रहरीले राउटे समुदायलाई सोमबारदेखि विशेष निगरानीमा राखेको छ । सार्वजनिक भएको भिडियो राउटे समुदायका बासिन्दाले देखेका यौन दुर्व्यवहारमा परेकी युवतीहरूको ज्यान जोखिममा पर्ने भन्दै बस्तीलाई प्रहरीले सुरक्षा व्यवस्था गरेको हो ।

राउटे समुदायमा बाहिरी मानिससँग घुलमिल भए कडा कारबाही गर्ने व्यवस्था रहेको छ । उक्त घटना राउटे समुदायमा पुगे उनीहरूको ज्यान जोखिममा हुन सक्ने प्रहरीले जनाएको छ ।

‘राउटे समुदायमा भित्री कारबाही हुने जानकारी आएको छ, तर कस्तो कारबाही हुने हो ? उहाँहरूको आफ्नै कानुन छ भन्ने विषयलाई विश्वास गर्न सकिँदैन,’ डिएसपी मगरले भने, ‘उहाँ (पीडित युवती)हरू आफ्नै क्याम्पमा जानु भएको छ, हामीलाई भेट्न दिएको छैन, त्यो हिसाबले उहाँहरूको अवस्था के छ भन्ने यथार्थ थाहा छैन, सुरक्षित हुनु हुन्छ होला भन्ने आशा छ ।’ भोलि युवतीमाथि तलमाथि भए ठूलो चुनौती हुन सक्ने उनले बताए ।

राउटे समुदायका युवा युवतीलाई आर्थिक प्रलोभन तथा मदिरा सेवन गर्न लगाएर मानसिक र यौन गतिविधि बढेको प्रहरीले जनाएको छ ।

पछिल्लो समय अन्य मानिससँग घुलमिल हुन नरुचाउने राउटे समुदायमा युट्युब, टिकटकलगायत सामाजिक सञ्जालका लागि पोष्ट गर्न मान्छेहरू जाने गरेका छन् । राउटे बस्ती पुग्नेहरूले उनीहरूलाई मदिरा सेवन गराउने, अश्लिल शब्दहरू बोल्न लगाउने, यौन दुव्र्यवहार गर्नेलगायतका अश्लिल काम गर्न लगाएको पाइएको प्रहरीले जनाएको छ । ‘अनैतिक गतिविधि गर्ने भएकाले बस्तीमा बाहिरी मान्छे प्रवेश गर्न रोक लगाएका छौँ,’ डिएसपी मगरले भने ।

डिएसपी मगरका अनुसार पक्राउ परेका तीन जनालाई इलाका प्रहरी कार्यालय छिञ्चुमा राखिएको छ ।