काठमाडौँ । संवैधानिक इजलासको बहस सुरु भएसँगै पुनर्गठन नहुने भएको छ । सरकारी पक्षका वकिलहरूले न्यायाधीशद्वय दीपक कार्की र आनन्दमोहन भट्टराईमाथि प्रश्न गर्दै इजलासबाट बाहिरिनु पर्ने माग राख्दै आएकोमा प्रधानन्यायाधीश चोलेन्द्र शमशेर जबराले पुनर्गठन नहुने जानकारी दिएका हुन् ।

दुई दिन स्थगित भई बुधबार बसेको इजलासमा प्रधानन्यायाधीश शमशेरले निवेदकको तर्फबाट बहस सुरु गर्न अनुमति दिए । सरकारी पक्षले आफ्नो कुरा सुन्न आग्रह गरे पनि उनले बेञ्चलाई निरन्तरता दिने बताएका थिए ।

बहस सुरु हुनुपूर्व न्यायाधीश ईश्वर खतिवडाले आफूहरू पाएको ऐतिहासिक जिम्मेवारीबाट नहट्ने बताए । उनले भने, ‘अब यो जिम्मेवारीबाट हामी भाग्दैनौँ ।’

उनले थपे, ‘भोलि फाइनल लेख्ने बेला के गर्ने गरौँला, अहिले यो बेञ्च नै फाइनल हो ।’