काठमाडौँ । प्रदेश नं १ को प्रदेशसभाको आठौँ तथा बजेट अधिवेशनको आइतबारबसेको बैठकमा वार्षिक नीति तथा कार्यक्रम बहुमतले पारित भएको छ । प्रदेशसभा नियमावली २०७४ को नियम ३८(१) बमोजिम आगामी आर्थिक वर्षका लागि सरकारको तर्फबाट प्रदेश प्रमुख सोमनाथ अधिकारी‘प्यासी’बाट सदनमा गत जेठ २७ गते नीति तथा कार्यक्रम प्रस्तुत भएको थियो ।

यस्तै, मुख्यमन्त्री शेरधन राईले सोही दिन सदनमा वार्षिक नीति तथा कार्यक्रम टेबल गरेका थिए । दुई दिन नीति तथा कार्यक्रममा छलफल हुँदा पहिलो दिन १० जनाले र दोस्रो दिन २२ जना सांसदले आ–आफ्ना राय, सुझाव र विचार व्यक्त गरेका थिए ।

मुख्यमन्त्री राईले नीति तथा कार्यक्रममा सांसदहरूले उठाएका प्रश्नहरूको जवाफमा आज सांसदहरुको सल्लाह, सुझाव, राय र विचारलाई मार्गदर्शकको रुपमा लिने बताए । उनले सरकारले कोरोना भाइरस (कोभिड–१९)बाट आम नागरिकलाई बचाउन पहिलो प्राथमिकतामा राखेको धारण राखे ।

मुख्यमन्त्री राईले समृद्धि बाजा बजाएर वा धुप बालेर नआउने भएकाले यसका लागि खोज र अविष्कार गर्नु पर्ने बताउँदै सरकार घरेलु उत्पादनलाई ‘ब्राण्ड’ बनाउने दिशामा रहेको बताए । उनले यस अधिवेशनमा प्रदेशको नामकरण गर्ने प्रस्ताव पनि सदनमा पेश हुने जानकारी दिए ।

नीति तथा कार्यक्रममा नेपाली कांग्रेसका तर्फबाट शेखरचन्द्र थापा, नेकपा (माओवादी केन्द्र)को तर्फबाट मोहनचन्द्र खड्का र जनता समाजवादी पार्टीको तर्फबाट जयराम यादवले संशोधन प्रस्ताव दर्ता गराएका थिए । सांसद यादवको सबै बुँदाहरु मुख्यमन्त्री राईले स्वीकार गरेपछि सो प्रस्ताव उनले फिर्ता लिएका थिए ।

अन्य दुई दलले दर्ता गरेको प्रस्ताव फिर्ता नलिएपछि बहुमतबाट अस्वीकृत भएको थियो । प्रदेशसभाको अर्को बैठक आगामी असार १ गते अपरान्ह ३ बजे बस्ने सभामुख सरस्वती पोखरेलले जानकारी दिए ।