काठमाडौं । साताको पहिलो र दोस्रो कारोबार हुने दिन आइतबार र सोमबार लगातार उकालो लागेको नेप्से मंगलबार घटेको छ ।

स्टक एक्सचेञ्जमा आबद्ध कम्पनीको शेयर कारोबार मापक बजार परिसुचक ३ दशमलव ७२ अंकले घटेर ३ हजार २२ दशमलव ११ अंकमा पुगेको स्टक एक्सचेञ्जले जनाएको छ । यो अघिल्लो दिनको तुलनामा शुन्य दशमलब १२ प्रतिशत कम हो ।

नेप्से एक्कासी घट्दा ठूला र साधारण शेयर लगानीकर्ता आफ्नो कम्पनीको शेयर घटेकोमा त्राहिमाम भएका छन् । यद्यपी शेयर कारोबार सम्लग्न नवराज अधिकारीले शेयर बजारमा मंगलबार ‘करेक्सन’ भएको जनाएका छन् । उनले एकैदिन सबै बढ्ने र सबै घट्ने नहुने भएकाले समयानुसार परिवर्तन हुनुमा आत्तिन नहुनेमा जोड दिए ।

अधिकारीका अनुसार लगानीकर्ताको आग्रहमै नेपाल धितोपत्र बोर्डले शेयर बजारमा सुशासन कायम गर्न खोजेपछि जलविद्युत, फाइनान्स र विकास बैंकको सेयर मूल्यमा गिरावट आएको हो ।

वित्तीय अवस्था नकारात्मक भएका, वर्षौसम्म लगानीकर्तालाई केही दिन नसकेका कम्पनीको सेयर मूल्य अस्वभाविक रुपमा उचालिएपछि नियामक निकायले सुक्ष्म निगरानी बढाएपछि विकास बैंक, फाइनान्स र जलविद्यत कम्पनीको सेयर मूल्यमा गिरावट आएको स्टक एक्सचेञ्जले जनाएको छ ।

मंगलबार बैंकिङ समूह ६ दशमबल ८ अंक मात्रै घटेको छ भने सबैभन्दा बढी विकास बैंक २ सय २२ दशमलब ८९ अंकले घटेको छ । त्यसैगरी, ८६ अंकले घटेको छ भने जलविद्युत् ९० अंकले घटेको छ । उत्पादनमुलक र अन्य समूहमा भने वृद्धि भएको छ ।

स्टक एक्सचेञ्जमा आबद्ध कम्पनीमध्ये मंगलबार कूल २ सय २६ कम्पनीको १ करोड ६४ लाख ७ सय ९० कारोबारबाट १६ अर्ब ५२ करोड ८७ लाख ४९ हजार ७ सय ३९ रुपैयाँ बराबरका ३ करोड ९ लाख ४८ हजार ८ सय ५३ कित्ता शेयर किनबेच भएको स्टक एक्सचेञ्जको मापनमा उल्लेख छ ।