काठमाडौं । कोठा नदिएको अभियोगमा ३ दिन हिरासत बसेका घरबेटीले रुपा सुनार विरुद्ध उजुरी दिएकी छन् । दलित भन्दै कोठा नदिएको आरोपमा ३ दिन हिरासतमा बसेर रिहा भएका घरबेटी सरस्वती प्रधानले आफ्नो अनुमति विना फोन रेकर्ड गरि व्यक्तिगत जीवनको स्वतन्त्रता हनन गरेको आरोपमा सञ्चारकर्मी सुनार विरुद्ध मानवअधिकार आयोगमा उजुरी दिएकी हुन् ।

रुपाले आवश्यकताविना नै आपराधिक नियतका साथ कोठा खोज्न आएर बहानावाजी गरेको सरस्वतीले उजुरीमा दावी गरेकी छन् । ‘मेरो मञ्जुरीबेगर फोन रेकर्ड गरी त्यसकै प्रमाण सिर्जना गरी मेरोविरुद्ध छुवाछुतको उजुरी दिई गैरकानूनी एवं मेरो वैयक्तिक जीवनको स्वतन्त्रता विपरीत हुने गरी पूर्वाग्रहपूर्वक थुनाइएको छ’, उनले उजुरीमा भनेकी छन् ।

दुईवटा कोठा १२ हजार रुपैयाँमा दिने भनेर कुरा मिलिसक्दा रुपाले नै जातको कुरा निकालेको सरस्वतीले बताएकी छन् । सरस्वतीले रुपासहित उनीसँग आएका दुई साथीहरुलाई पनि कारवाहीको माग गरेकी छन् ।