काठमाडौँ । प्रतिनिधिसभा विघटनसम्बन्धी मुद्दामा सोमबार बहस सकिएको छ । बहस सकिएसँगै आगामी असार २८ गते फैसला आउने भएको छ ।

प्रधानन्यायाधीश चोलेन्द्र शमशेर राणाले बहस ‘हेर्दाहेर्दै’मा राखेर २८ गते फैसला सुनाउने जानकारी दिएका छन् । बहस सकिएकाे जानकारी दिँदै उनले फैसाल सार्वजनिक हुने मिति तोकेका हुन् ।

सोमबार कांग्रेस सभापति शेरबहादुर देउवासहित १ सय ४६ जना विघटित प्रतिनिधिसभाका सदस्यहरूको तर्फबाट जवाफी बहस सकिएसँगै एमिकस क्युरीले राय दिएका थिए । एमिकस क्युरीका तर्फबाट वरिष्ठ अधिवक्ताहरू कोमल प्रकाश घिमिरे, प्रकाश बहादुर केसी, राघवलाल वैद्य र उषा मल्ल पाठकले राय दिएका थिए ।