काठमाडौं । नेपाली कांग्रेसको क्रियाशील सदस्यता विवाद समाधान गर्न गठन भएको समितिले थप समय मागेको छ । समितिले शुक्रबार साँझ कांग्रेस सभापति तथा प्रधानमन्त्री शेरबहादुर देउवा र वरिष्ठ नेता रामचन्द्र पौडेलसँग बालुवाटारमा छलफल गरी थप दुई दिनको समय माग गरेको छ ।

कांग्रेस क्रियाशिल सदस्य छानबिन समितिले क्रियाशिल विवाद समाधान गर्न नसकेपछि सभापति देउवालाई प्रतिवेदन बुझाउदै केन्द्रीय समिति बैठकबाट टुङ्गो लगाउन आग्रह गरेको थियो । केन्द्रीय कमितिबाट पनि टुङ्गो लगाउन नसकेपछि पुनः समितिलाई नै जिम्मा दिएको थियो ।

समितिले दिएको समयमा विवाद समाधान गर्न नसकेपछि पूर्व महामन्त्री कृष्णप्रसाद सिटौला र केन्द्रीय सदस्यहरु डा. मिनेन्द्र रिजाल र रमेश लेखकलाई विवाद समाधान गर्न जिम्मा दिएको थियो । उनीहरुले पनि दिएको समयमा विवाद समाधान गर्न नसकेपछि पुन: दुई दिनको समय माग गरेका हुन् ।

कांग्रेसले महाधिवेशन मंसिर ९ देखि १३ गते सम्म गर्ने निर्णय गरेको छ । क्रियाशील सदस्यता विवाद तत्काल नटुंगिए महाधिवेशन कार्यतालिका पुनः प्रभावित हुने बताइएको छ ।