काठमाडौँ । सत्ता साझेदारी दलका शीर्ष नेताको बैठक सकिएको छ । प्रधानमन्त्र निवास बालुवाटारमा बसेको बैठक पुनः बस्ने गरी सकिएको हो ।

प्रधानमन्त्री शेरबहादुर देउवाले सत्ता सम्हालेको ५० दिन पुग्दासमेत मन्त्रिपरिषद् विस्तार गर्न नसकेका सत्तारुढ दलहरूले आज मन्त्री मण्डल विस्तार गर्ने विषयमा छलफल गरेका थिए ।

आजको बैठकमा मन्त्रालय बाँडफाँडमा भागबण्डा नमिल्दा बैठक निष्कर्षविहीन भएर टुंगिएको बालुवाटार स्रोतले जनाएको छ । यससँगै मन्त्री मण्डल विस्तार थप अन्योल बन्न पुगेको छ ।

बैठकमा नेकपा एकीकृत समाजवादी पार्टीका अध्यक्ष माधव कुमार नेपाल र जनता समाजवादी पार्टी (जसपा)का अध्यक्ष उपेन्द्र यादवले एउटै मन्त्रालयमा दाबी गरेसँगै बैठक निष्कर्षविहीन बन्न पुगेको हो ।

यस्तै, कांग्रेसले स्वास्थ्य र परराष्ट्र मन्त्रालयमा दाबी प्रस्तुत गरेको छ । प्रधानमन्त्री देउवाले कम्युनिस्ट सरकार हुँदा परराष्ट्र सम्बन्ध बिग्रिएको भन्दै परराष्ट्र मन्त्रालय आफैले राख्न चाहेका हुन् ।

यसअघि कांग्रेसले आकर्षक मन्त्रालयहरू गृह र कानुन पाइसकेको छ । नेकपा माओवादी केन्द्रले उर्जा र अर्थ मन्त्रालय पाइसकेको छ ।

यो पनि पढ्नुहोस् : सत्ता गठबन्धनलाई मन्त्रिपरिषद् विस्तार गर्न सकस