काठमाडौँ । नेपाली कांग्रेसको १४ औँ महाधिवेशन कार्य तालिका पुनः प्रभावित हुने देखिएको छ । कांग्रेसको २१ जिल्लामा क्रियाशील सदस्यता विवाद चर्किएपछि संस्थापनइतर पक्षले पालिकाको अधिवेशन रोकेर क्रियाशील सदस्ता विवाद टुंग्याउन माग गरेका थियो । कांग्रेसका शीर्ष नेताहरूको शुक्रबार बसेको बैठकले अधिवेशन सार्ने निर्णयसमेत गरिसकेको छ ।

स्रोतका अनुसार भदौ २७ गतेका लागि निर्धारण गरेको गाउँ, नगरपालिका अधिवेशन असोज ९ गतेका लागि प्रस्ताव गरिएको छ भने असोज १ गतेका लागि निर्धारित प्रदेशसभा क्षेत्रीय अधिवेशन असोज ११ गते, असोज ५ गतेका लागि तय गरिएको प्रतिनिधिसभा क्षेत्रीय अधिवेशन÷एकमात्र प्रतिनिधिसभा निर्वाचन क्षेत्र भएका जिल्लाको जिल्ला अधिवेशन असोज १३ गते प्रस्ताव गरिएको स्रोतले जानकारी दिए ।

एकभन्दा बढी प्रतिनिधिसभा निर्वाचन क्षेत्र भएका जिल्लाको अधिवेशनको मिति असोज १६ का लागि प्रस्ताव गरिएको छ । यसअघि उक्त अधिवेशन असोज १० गते गरिने निर्णय गरिएको थियो । कार्तिक १०–१२ मा हुने भनिएको क्षेत्रीय अधिवेशन र मंसिर ९–१३ मा हुने भनिएको केन्द्रीय महाधिवेशनको मिति भने यथावत राखिएको स्रोतले मेरोन्युजलाई जानकारी दियो । क्रियाशील सदस्य विवाद हुँदा २१ जिल्लाको नामावली पार्टीले सार्वजनिक गरेको छैन ।