काठमाडौँ । गण्डकी प्रदेशका मुख्यमन्त्री कृष्णचन्द्र नेपाली पोखरेलले नेपाली कांग्रेसको आसन्न महाधिवेशनमा कार्यकर्ताले गुटबन्दीभन्दा योग्यता र दक्षताका आधारमा नेतृत्व चयन गर्नु पर्ने बताएका छन् । नेपाली कांग्रेसको १४ औँ महाधिवेशनअन्तर्गत पोखरा महानगर समितिको अधिवेशनको शुक्रबार आयोजित एक कार्यक्रममा उनले जनताको भरोसाको केन्द्र कांग्रेस भएकाले आन्तरिक स्वस्थ प्रतिस्पर्धामार्फत नेतृत्वमा आउन कार्यकर्तालाई आग्रह गरे ।

गुटबन्दीको राजनीतिभन्दा योगदान, समर्पण र दक्षता एवं योग्यताका आधारमा नेतृत्व चयन गर्न मतदातालाई सुझाव दिँदै उनले पार्टी संगठनलाई सशक्त बनाएर लैजान सक्ने नेतृत्व आवश्यक भएको बताएका थिए । पोखरा महानगर समितिको अधिवेशनले आगामी कार्यकालका लागि १६५ सदस्यीय कार्यसमिति चयन गर्ने छ ।

नेतृत्वमा एक महिलासहित ६ जनाको सभापतिमा उम्मेदवारी दर्ता भएको निर्वाचन अधिकृत आरसी विमलले जानकारी दिइन् । उनका अनुसार समितिको पदाधिकारी चयनका लागि हुने निर्वाचनका लागि कुल मतदाता एक हजार ३७० मतदाता छन् ।

महानगरको सभापति पदका लागि सुरेन्द्रमान बिजुक्छे, रामराज लामिछाने, मोहनप्रसाद बास्तोला, मिलन तिवारी, गंगाधर पराजुली र ज्योति हमालले उम्मेदवारी दिएका छन् । यसैबीच महानगरमा सभापतिको उम्मेदवारी दिएका गंगाधर पराजुलीले पत्रकार सम्मेलन गर्दै पोखरा महानगरपालिकामा नेपाली कांग्रेसलाई सबैले भरोसा गर्ने पार्टीका रूपमा स्थापित गर्न आफूले उम्मेदवारी दिएको बताए ।

लामो समय पत्रकारिता क्षेत्रमा बिताएका पराजुलीले यसअघि नेपाल पत्रकार महासंघ तथा नेपाल प्रेस युनियनको केन्द्रीय उपसभापतिका साथै रासस सञ्चालक समितिको सदस्य एवं न्युनतम पारिश्रमिक निर्धारण समितिको अध्यक्षलगायतका जिम्मेवारी सम्हालिसकेका छन् ।