काठमाडौँ । टाटा सुमो जिप दुर्घटना हुँदा एक जनाको मृत्यु भएको छ । ओखलढुंगाको मानेभञ्ज्याङ गाउँपालिका ६ मितेरी भञ्ज्याङमा सुमो दुर्घटना हुँदा बारा घर भएका करिब ४० वर्षीय पृथ्वीबहादुर श्रेष्ठको घटना स्थलमै मृत्यु भएको हो ।

मृतक श्रेष्ठको स्थायी ठेगाना बारा जिल्ला भन्ने खुले पनि स्थानीय ठेगाना यकीन भइनसकेको जिल्ला प्रहरी कार्यालयका प्रमुख गोविन्दराज काफ्लेले जानकारी दिए । बा ११ च ५२१० नम्बरको सुमो दुर्घटना हुँदा बाँकी ९ जना घाइते भएका छन् । घाइते हुनेमा दुई महिला, चार नाबालक र चालकसहित अन्य दुई पुरुष छन् ।

दुर्घटनाका घाइतेमध्ये चार जनाको अवस्था गम्भीर रहेको प्रहरीले जनाएको छ । घाइतेको उदयपुरको घुर्मीमा उपचार भइरहेको छ ।

सिद्धिचरण नगरपालिकाको निशंखे हुँदै मानेभञ्ज्याङ १ मोलीको बाटो भएर काठमाडौँका लागि छुटेको सुमोमा १० व्यक्ति सवार थिए । दुर्घटनाका घाइतेको उद्धार र घटनाको अनुसन्धानका लागि जिल्ला प्रहरी कार्यालय प्रमुख काफ्लेसहितको प्रहरी टोली घटना स्थल पुगेको छ ।