काठमाडौँ । नेकपा एमाले सभामुख अग्निप्रसाद सापकोटाले बोलाएको सर्वदलीय बैठकमा सहभागी नहुने भएको छ । सभामुख सापकोटाले सोमबार दिउँसो साढे २ बजे सर्वदलीय बैठक बोलएका छन् ।

उनले संसदमा प्रतिनिधित्व गर्ने दलका संसदीय दलका नेतालाई छलफलका लागि बोलाएका हुन् । एमालेले संसद बैठकलाई निरन्तर अवरोध गर्दै आएपछि त्यसको नाकसका लागि उनले सर्वदलीय बैठक बोलाएका हुन् । तर सभामुखले बोलाएको सर्वदलीय बैठकमा नेकपा एमालेका संसदीय दलका नेता केपी शर्मा ओली सहभागी नहुने भएका छन् ।

सर्वदलीय बैठकको कुनै औचित्य नभएकाले ओली बैठकमा सहभागी नहुने एमाले सचेतक शान्ता चौधरीले बताइन् । उनले सर्वदलीय बैठक राखेर यो समस्या समाधान नहुने बताइन् । सभामुख र एमालेबीच समस्या भएको भन्दै उनले अरुसँग बस्नुको कुनै अर्थ नभएको बताइन् । पार्टीबाट कारबाही गरेका माधव नेपाल पनि बैठकमा आउने भएकाले त्यो बैठकमा सहभागी नहुने एमालेले जनाएको छ ।