काठमाडौं । नेकपा (क्रान्तिकारी माओवादी)का नेता सीपी गजुरेलले कुनै पनि हालतमा नेपाललाई विदेशीको रणभूमि बनाउन नदिने बताएका छन् ।

नेत्रविक्रम चन्द विप्लव नेतृत्वको नेपाल कम्युनिस्ट पार्टीको आयोजनामा काठमाडौंको खुलामञ्चमा आयोजित एमसीसीविरुद्धको सभामा बोल्दै गजुरेलले एमसीसीकाे नामबाट देशलाई विदेशीको रणभूमि बनाउन नदिने बताए ।

सिरियामा जसरी विदेशीहरुको आक्रमण भइरहेको छ, त्यसरी नेपाललाई सिरिया बनाउन दिन तयार नभएको गजुरेलले बताए ।

सबै देशभक्त एक हुन पनि नेता गजुरेलले आह्वान गरेका छन् । उनले विप्लव नेतृत्वको नेकपा र आफ्नो पार्टीबीच कहिले एकता हुन्छ भनेर जनताले सोधिरहेको पनि उनले बताए ।

विप्लवसँग मात्र नभई सबै क्रान्तिकारी देशभक्तहरु एक हुनुपर्ने भन्दै उनले सोही मञ्चबाट संसद बाहिरको क्रान्तिकारी पार्टीहरुबीच एकताका लागि आग्रह गरे ।