काठमाडौँ । नेकपा एकीकृत समाजवादी पार्टी एसका अध्यक्ष माधव कुमार नेपालले तत्काल अर्को पार्टीसँग एकीकरण नहुने बताएका छन् । शुक्रबार काठमाडौंको मीनभवनमा नेकपा एसको केन्द्रीय कार्यालय भवन उद्घाटनपछि अध्यक्षको पदभार ग्रहण गर्दै नेपालले तत्काल कुनै पार्टीसँग एकीकरण नहुने प्रष्ट पारे ।

उनले पाँच दलीय गठबन्धनलाई निरन्तरता दिने र आगामी चुनावमा गठबन्धनसँग तालमेल गर्ने बताए । उनले आगामी चुनावमा सत्तारुढ गठबन्धन मिलेर एमालेविरुद्ध जाने बताए ।

एमाले दक्षिणपन्थी भासमा डुबेको उनले बताए । नेपालले पाँच दलीय गठबन्धन तोड्न अनेक प्रयास भइरहेको भन्दै त्यसलाई सफल हुन नदिइने बताए । अध्यक्ष नेपालले एमसीसीबारे कुनै निर्णय नभएको बताए । उनले सरकारले दुई हप्ताभित्र पूर्णता पाउने बताए । आफ्नो पार्टी सरकारमा भुमिका खल्ने भन्दै नेपालले प्रदेश १ र बागमती प्रदेशमा एकीकृत समाजवादीको सरकार बन्ने बताए ।

यस्तै अध्यक्ष नेपालले आफ्नो पार्टीले नयाँ मानक स्थापित गर्ने बताए । उनले सबै पार्टी र नेता उस्तै हुन् भन्ने मान्यतालाई चिर्ने पनि बताए । उनले भने, ‘हामी सबै पार्टी र नेता उस्तै हुन् भन्ने मान्यता चिर्नेछौं । हामी गफबाट होइन, व्यवहारले पुष्टी गर्नेछौं । हामी यथार्थ कुरा गर्नेछौं, जनतालाई अल्मल्याउन दशथरी कुरा गर्दैनौं ।’ उनले समाजवाद कस्तो हुनसक्छ भनेर बौद्धिक छलफल गरी अघि बढ्ने बताए ।