काठमाडौं । नेकपा (माओवादी केन्द्र) निकटको विद्यार्थी संगठन अखिल (क्रानितकारी)को राष्ट्रिय सम्मेलन सरेको छ । एक साता पछि गर्ने गरी सम्मेलन सरेको अखिल क्रानितकारीका महासचिव उत्तम अधिकारीले जानकारी दिए ।

अखिल क्रान्तिकारीको २२ औं राष्ट्रिय सम्मेलन यही असोज ८, ९ र १० गते गर्ने भनिएको थियो । तर तयारी नपुगेपछि एक साता पछि सार्ने निर्णय भएको महासचिव अधिकारीले बताए । अव सम्मेलन असोज १४, १५ र १६ गते काठमाडौंमा हुने भएको छ ।

पार्टी अध्यक्ष प्रचण्डसागको परामर्शका आधारमा क्रान्तिकारीले सम्मेलन एक साता पछि सार्ने निर्णय लिएको हो ।
प्रचण्डले सर्वसहमतिमा राष्ट्रिय सम्मेलनबाटै नयाँ नेतृत्व चुन्न सुझाव दिएका थिए । नयाँ नेतृत्वका लागि उपाध्यक्षहरु सुरेन्द्र बस्नेत, पञ्चा सिंह, दिपक देवकोटा, तिलक भण्डारी र महासचिव उत्तम अधिकारी मुख्य दावेदार छन् ।

छलफलमा माओवादी केन्द्रका नेता एवम् विद्यार्थी फाँट हेर्ने फ्याक्सन इञ्चार्ज हितमान शाक्य समेत सहभागी थिए ।