काठमाडौँ । क्यानडाका प्रधानमन्त्री जस्टिन ट्रुडो तेस्रोपटक प्रधानमन्त्री बन्ने भएका छन् । गत सोमबार भएको संसदीय निर्वाचनमा उनी निर्वाचित भएका हुन् ।

मतगणना जारी रहेकाले अहिले उनको पार्टी लिवरल पार्टीले अधिकांश ठाउँमा अग्रता कायमै राखेको छ । उनको पार्टीको जितसँगै उनी तेस्रोपटक प्रधानमन्त्री भन्ने भएका छन् ।

निर्वाचनमा उनको दल र उनी फेरि विजयी हुने पुर्वानुमान स्थानीय सञ्चार माध्यमले लेखेका छन् । उनी यसअघि सन् २०१५ देखि देशको प्रधानमन्त्री रहँदै आएका छन् । त्यसपछि उनले पछिल्लो ६ वर्षमा अहिलेसम्म तीनपटक आम निर्वाचन जितेका थिए ।

अहिले ४९ वर्ष पुगेका ट्रुडो कुबेक शहरको पापीनोबाट सांसदमा निर्वाचित हुँदै आएका थिए । स्थानीय सञ्चार माध्यम सिबिसी र सिटिभी दुवैले लिबरल दलको सरकार बन्ने बताउँदै आएको छ ।

प्रधानमन्त्री ट्रुडोले आफू निर्वाचित भएको जानकारी दिँदै निर्वाचन अधिकृतको प्रशंसासहित धन्यवाद दिएका छन् ।

अहिले मतगणना भइरहँदा १४१ ठाउँमा उनको पार्टीको अग्रता रहेको छ भने विपक्षी दल कन्जरभेटिभ ९९ ठाउँमा अगाडि देखिएको छ ।

क्यानडामा अहिले ३३८ सिटका लागि निर्वाचन भएको हो । बहुमतका लागि कम्तीमा १७० ठाउँमा जित हासिल गर्नु पर्दछ ।