काठमाडौं । झण्डै अढाई महिनादेखि सरकार विस्तार हुन नसकेपछि सत्तारुढ गठबन्धनबीच बुधबार भएको छलफल पनि अनिर्णित भएको छ ।

सत्तारुढ गठबन्धन दलहरुबीच सहमति नजुटेपछि सरकारले पूर्णता पाउन अझै केही दिन लाग्ने भएको छ ।

मन्त्रिपरिषद् विस्तार गर्नेबारेमा सहमति जुटाउन बुधबार बेलुका बालुवाटारमा पाँच दलका नेताहरुबीच छलफल भएको थियो ।

प्रधानमन्त्रीको निवास बालुवाटारमा बुधबार साँझ बसेको गठबन्धनको बैठकमा मन्त्रिपरिषद् विस्तार र राजनीतिक दलसम्बन्धी अध्यादेशबारे कुनै सहमति जुटाउन नसकेको माओवादी केन्द्रका नेता नारायणकाजी श्रेष्ठले जानकारी दिए ।

बैठकमा जनता समाजवादी पार्टी र माधव नेपाल नेतृत्वको एकीकृत समाजवादीलाई समेटेर मात्रै मन्त्रिपरिषद् विस्तार गर्ने सहमति भएको छ ।

बुधबारको बैठकमा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र नारायणकाजी श्रेष्ठ, नेकपा एकीकृत समाजवादीका अध्यक्ष माधव नेपाल, जनता समाजवादीका अध्यक्ष उपेन्द्र यादव र बाबुराम भट्टराई, काँग्रेस महामन्त्री पूर्णबहादुर खड्का र कानुनमन्त्री ज्ञानेन्द्र कार्की सहभागी थिए ।

सत्तारुढ गठबन्धनबीच मन्त्रिपरिषद् विस्तार गर्नेबारेमा मंगलबार पनि बालुवाटारमा बैठक बसेको थियो । उक्त बैठकमा डा. नारायण खड्कालाई परराष्ट्र मन्त्री बनाउने सहमति भएपछि बुधबार खड्काले मन्त्रीको सपथ लिएका थिए ।

खड्कालाई मन्त्री बनाउन गठबन्धन दलहरु सहमत भए पनि कांग्रेसभित्रै असन्तुष्टी भने चुलिएको छ ।