काठमाडौँ । अरुण भ्याली हाइड्रोपावर डेभलपमेन्ट कम्पनीको लाभांश सुरक्षित गर्ने आइतबार अन्तिम दिन रहेको छ । कम्पनीले साधारणसभा प्रयोजनको लागि असोज ११ गते बुक क्लोज गर्ने निर्णय गरेकोले असोज १० गतेसम्म कायम शेयरधनीले साधारणसभामा भाग लिन र प्रस्तावित लाभांश पाउने छन् ।

कम्पनीले असोज २४ गतेको साधारणसभा गर्ने भएको छ । कम्पनीले आर्थिक वर्ष ७७/७८ को मुनाफाबाट लगानीकर्तालाई १० प्रतिशत बोनस शेयर र कर प्रयोजनको लागि ०.५२६ प्रतिशत नगद लाभांश गरि कुल १०.५२६ प्रतिशत लाभांश वितरण गर्ने प्रस्ताव गरेको हो । कम्पनीको साधारणसभाले पारित गरेपछि लगानीकर्तामा वितरण हुने छ ।

त्यस्तै कम्पनीले हकप्रद पनि प्रस्ताव गरेको छ । कम्पनीले बोनस शेयर वितरण गरेपश्चात कायम हुने चुक्ता पुंजीको १ः०.५ को अनुपातमा ५० प्रतिशत हकप्रद निष्काशन गर्ने प्रस्ताव गरेको हो । साधारणसभाले पारित गरेपछि कम्पनीको हकप्रद प्रस्ताव अगाडि बढ्ने छ । कम्पनीको हकप्रदलै विद्युत नियमन आयोग र नेपाल धितोपत्र बोर्डले पनि अनुमति दिनु पर्ने नियम छ ।

यस्तै साहस उर्जा लिमिटेडले निष्काशन गरेको आईपिओमा आवेदन दिने समय आइतबार अन्तिम दिन रहेको छ । कम्पनीले असोज ६ गते बुधबारबाट सर्वसाधारणको लागि साधारण सेयर निष्काशन बिकी खुला गरेको हो । कम्पनीले प्रति कित्ता १०० रुपैयाँका दरले ७० करोड रुपैयाँ बराबरको ७० लाख कित्ता शेयर निष्काशन गरेको हो ।

७० लाख कित्ता मध्ये ३ प्रतिशत सेयर २ लाख १० हजार कित्ता कर्मचारीका लागि, ५ प्रतिशत अर्थात ३ लाख ५० हजार कित्ता म्युचुअल फण्डको लागि र बाँकी ६४ लाख ४० हजार कित्ता सर्वसाधारणको लागि छुट्याइएको छ । इच्छुकले कम्तिमा १० र बढीमा १० लाख ५० हजार सम्म आबेदन दिन पाउनेछन् । शेयर निष्काशनको लागि एनआईबिएल एस क्यापिटल बिक्रि प्रबन्धक रहेको छ । यस आईपिओमा असोज १० सम्म आवेदन दिन सकिने छ ।

कम्पनीको आईपिओमा गत शुक्रबार अर्थात् तेस्रो दिनसम्म ३.८२ गुणा बढीको आवेदन परेको छ । कम्पनीले ८६ मेगावाटको सोलु खोला हाइड्रोइलेक्ट्रिक आयोजनाबाट निर्माण गरिरहेको छ ।

यसैबीच नबिल इन्भेष्टमेन्ट बैंकिङले संचालन गरेका २ वटा सामूहिक लगानी कोष योजनाको लाभांश सुरक्षित गर्ने आइतबार अर्थात असोज १० गते अन्तिम दिन रहेको छ । कम्पनीले लाभांश वितरणको लागि असोज ११ गते बुक क्लोज गरेकोले आइतबार कायम लगानीकर्ताले नबिल इक्विटी फण्ड र नबिल ब्यालेन्सड फण्ड २ को लाभांश पाउँन सक्ने छन् ।

आर्थिक वर्ष ७७÷७८ को नबिल इक्विटी फण्डले करसहित ४० प्रतिशतले हुन आउने ५० करोड बराबरको नगद लाभांश वितरण गर्ने छ । त्यस्तै नबिल ब्यालेन्सड फण्ड २ ले करसहित ३५ प्रतिशतले हुन आउने ३९ करोड २० लाख बराबरको नगद लाभांश वितरण गर्ने छ । यो दुवै योजना नबिल म्युचुअल फण्ड अन्तर्गत संचलित योजना हुन् ।