काठमाडौँ । संखुवासभाको मादी नगरपालिका १ उम्लिङ खोला गाउँमा एकै घरका ६ जनाको हत्यामा संलग्न आरोपीलाई थुनामा राख्न आदेश दिएको छ । जिल्ला अदालत संखुवासभाले उनीहरूलाई थुनामा राख्न आदेश दिएको हो ।

अदालतले घटनामा संलग्न भएका ४ जना अभियुक्तलाई पुर्पक्षका लागि जेल चलान गर्न आदेश दिएको हो । उम्लिङ खोला गाउँका खड्गबहादुर कार्की, लोकबहादुर कार्की, रणबहादुर कार्की र हस्तबहादुर कार्कीलाई सोमबार पुर्पक्षका लागि जेल चलान गर्न आदेश दिएको अदालतले जनाएको छ । अदालतले १७ वर्षीय नरेश कार्कीलाई बाल सुधार गृह विराटनगर पठाउन आदेश दिएको छ ।

गत भदौ २१ गते बिहान मादी १ उम्लिङ खोला गाउँस्थित ५२ वर्षीय तेजबहादुर कार्की, ८४ वर्षीया उनीकी आमा पार्वती कार्की, ५२ वर्षीया श्रीमती कमला कार्की, बुहारी ३२ वर्षीया रञ्जना कार्की, नाति ८ वर्षीय दीपेन कार्की र नातिनी ५ वर्षीया गोमा कार्कीको सामूहिक हत्या भएको थियो ।