काठमाडौँ । शेरबहादुर देउवाको नेतृत्वमा सरकार गठन भएलगत्तै नेकपा (एकीकृत समाजवादी)बाट मन्त्री बन्नेहरुको सम्भावित नामहरुबारे पनि चर्चा चल्नु स्वभाविकनै थियो । पछिल्लो करिब तीन महिनादेखीको त्यो चर्चामा एकीकृत समाजवादीबाट मेटमणी चौधरीको नामपनि मन्त्री बन्नेको सूचिमा सबैभन्दा बढी चर्चामा थियो ।

हुनपनी एमाले विभाजन हुनुभन्दा अघिदेखीनै सबैभन्दा बढी केपी शर्मा ओलीको आलोचना चौधरीले सार्वजनिक रुपमा गरीरहेका थिए । उनले पार्टी एकता भएपनि आफू एमालेमा नबस्ने घोषणासमेत गरेका थिए । सोही कारणपनि उनलाई सम्भावित मन्त्रीको रुपमा सबैले लिएका थिए । सायद उनी पनि मन्त्री बन्नेमा ढुक्क थिए । देउवा नेतृत्वको सरकार बनेको अर्कोदिननै उनले बानेश्वरमा रहेको एक टेलरिङमा दौरा सुरुवाल र कोट सिलाईको अर्डर गरेका थिए ।

उनले टेलरिङमा एक दुई दिनभित्रै सिलाईसक्नुपर्ने भन्दै आग्रह गरेका थिए । चौधरी सार्वजनिक व्यक्तित्व भएकाले सो टेलरिङमा रहेका अन्य ग्राहकहरुले पनि मन्त्री बन्नलाई होक्या नेताज्यू भन्दै उनलाई जिस्काएका थिए । उनले पनि मन्द मुस्कानको जवाफबाट सहमति जनाएको एक प्रत्यक्षदर्शीले मेरोन्यूजलाई बताए । तर आज एकीकृत समाजवादीले मन्त्री बन्नेहरुको नामावली सार्वजनिक गर्दैगर्दा चौधरीको नाम मन्त्री बन्नेको लिस्टमा अट्न सकेको छैन ।

सामाजवादीबाट विरोध खतिवडा, रामकुमारी झाँक्री, प्रेम आले र किसान श्रेष्ठ मन्त्री बन्दैछन् । एकीकृत समाजवादीले पाएका चार मन्त्रालय क्रमशः शहरी विकासमा खतिवडा, स्वास्थ्यमा झाँक्री, पर्यटनमा आले र श्रममा श्रेष्ठलाई पठाउने निर्णय गरेको छ ।

यो पनि पढ्नुहोस्

एकीकृत समाजवादीले टुंग्यायो मन्त्री र मन्त्रालय, कुन मन्त्रालयमा को मन्त्री ?