काठमाडौँ । कानून न्याय तथा संसदीय मामिलामन्त्री ज्ञानेन्द्रबहादुर कार्कीले मन्त्रिपरिषद्मा प्रधानन्यायाधीशले भाग नमागेको बताएका छन् । शुक्रबार बसेको प्रतिनिधिसभाको बैठकमा उनले प्रधानन्यायाधीश चोलेन्द्रशमशेर राणाले मन्त्रिपरिषद्मा भाग मागेको भन्ने विषयमा कुनै सत्यता नभएको बताए ।

बैठकमा नेपाल मजदुर किसान पार्टीका सांसद प्रेम सुवालले प्रधानन्यायाधीशले सरकारमा भाग मागेको भन्ने आएको भन्दै सरकारको ध्यानाकर्षण गरेका थिए । त्यसको जवाफमा सरकारका प्रवक्तासमेत रहेका कानुन मन्त्री कार्कीले प्रधान्यायाधीशले मन्त्रिपरिषद्मा भाग मागेको भन्ने विषयको भ्रममा नपर्न आग्रह गरे ।

मन्त्री कार्कीले प्रधानमन्त्री शेर बहादुर देउवाको तर्फबाट संघीय निजामति सेवा विधेयक र रेल्वे सेवा विधेयक फिर्ता लिएका थिए ।