काठमाडौँ । नेकपा माओवादी केन्द्रको एक लाख ७४ हजार बढीले पुरानो सदस्यता नवीकरण गरेका छन् । संगठन विभागका एक सदस्यले दिएको जानकारीअनुसार यो पुरानो सदस्यता नवीकरणको संख्या मात्र हो ।

माओवादी केन्द्रले कात्तिक २५ गतेसम्म नयाँ सदस्यता वितरण र पुरानो सदस्यता नवीकरणको कामलाई तीव्रता दिएर राष्ट्रिय सम्मेलनसम्म ६ लाख र आगामी चुनावसम्म ३१ लाख पार्टी सदस्य पुर्याउने महत्वाकांक्षी योजना बनाएको छ । बिहीबार बिहान १० बजेसम्मको अपडेटका आधारमा एक लाख ७४ हजार १५४ जना पुराना सदस्यले पार्टी सदस्यता नवीकरण गरेका छन् ।

माओवादी केन्द्रमा लामो समयदेखि देशभर पार्टी सदस्यता कति छन् ? उनीहरूको नवीकरणको अवस्था के छ ? भन्ने यकिन तथ्यांक थिएन । तर, अहिले उसले कम्युटर प्रणालीबाटै देशभरबाट सदस्यता नवीकरण र नयाँ सदस्यताको ‘इन्ट्री’ गर्ने काम गरिरहेको छ ।

स्थायी समिति सदस्य शक्ति बस्नेतले अहिले सबै प्रदेश स्तरबाटै सदस्यता वितरण र पुराना सदस्यको नवीकरणको काम भइरहेको जानकारी दिए । ‘पार्टीले अहिले देशैभरबाट पुरानाको नवीकरण र नयाँ सदस्यता वितरणको काम आक्रामक ढंगले शुरु भइरहेको छ,’ बस्नेतले भने, ‘कात्तिक २५ सम्म पुग्दा पार्टीले लिएको लक्ष्यअनुसारको सदस्य संख्या पुग्ने अनुमान छ ।’

पुरानो सदस्यता नवीकरणमा सबैभन्दा बढी कर्णाली प्रदेशले गरेको छ । माओवादीको संगठन विभागले दिएको जानकारीअनुसार कर्णाली प्रदेशमा मात्रै ५५ हजार ४६३ जनाले सदस्यता नवीकरणको काम सम्पन्न गरिसकेका छन् । त्यसपछि सबैभन्दा बढी लुम्बिनी प्रदेशले नवीकरणको काम गरेको छ । अन्य प्रदेशमा नवीकरणको कामअगाडि बढाइएको संगठन विभागका एक नेताले जानकारी दिए ।

माओवादी केन्द्रले पार्टी सदस्यता ४ लाख बढी रहेको बताउँदै आएको थियो । माओवादी र एमाले एकता हुँदा दुवै पार्टीका गरी करिब ८ लाखमाथि पार्टी सदस्यता रहेको अनुमान गरिएको थियो । एमालेको पार्टी सदस्यको भने यथार्थ तथ्यांक रहेकाले संख्या निकाल्न सकिए पनि माओवादीतर्फको तथ्यांक अभिलेखीकरण नहुँदा संख्या यकिन गर्न कठिन भएको थियो ।

नेपाली कांग्रेसले महाधिवेशन सम्पन्न गर्नका लागि नयाँ र पुरानो गरी ८ लाख ५२ हजार ७११ जना क्रियाशील सदस्य रहेको सूची पछिल्लोपटक सार्वजनिक गरेको थियो ।

नवीकरण गराउने भन्दा नयाँ सदस्यता लिने बढी

माओवादी केन्द्रले अहिले भने अभिलेखीकरण गर्ने गरी सदस्यता नवीकरण र नयाँ सदस्यता वितरणको कामअगाडि बढाएको छ । तर, उसको पुरानो सदस्यता नवीकरण गराउनेको संख्याभन्दा नयाँ सदस्यता लिनेको संख्यामा गुणात्मक वृद्धि आएको माओवादीका नेताहरुले बताएका छन् ।

नयाँ सदस्यता लिनेको संख्या माओवादीमा ह्वात्तै बढेको संगठन विभागले जनाएको छ । खासगरि १८ देखि ३० वर्ष उमेर समूहका युवाहरूले माओवादीको नयाँ सदस्यता बढी मात्रामा लिएको माओवादीको संगठन विभागले जनाएको छ । नयाँ सदस्यता वितरण भने अहिलेसम्म कति संख्यामा भयो भन्ने यकिन तथ्यांक संगठन विभागमा केन्द्रीकृत भइसकेको छैन । तर, सरदर पूराना सदस्य नविकरण भएकै सरह नयाँ सदस्यता वितरणको काम पनि भएको माओवादीको संगठन विभागका एक सदस्यले बताए ।

उनका अनुसार कात्तिक २५ सम्म पार्टीले सदस्यता नवीकरण र सदस्यता वितरणको समय तालिका तोकेकाले पनि सो अवधिसम्म पार्टीले राखेको लक्ष्य भेटिने छ । दशैँको बेला सदस्यता वितरण केही सुस्ताए पनि हिजो बुधबारदेखि दशैँ सकिएकाले आजबाट सदस्यता वितरणको काम थप आक्रामक हुने माओवादी नेताहरु बताउँछन् । ‘तिहारअगाडि नै मोटामोटी संख्या कति पुग्ने भन्ने एउटा खाका आउँछ,’ ती नेताले भने ।

माओवादी प्रवक्ता कृष्णहादुर महराले भने पार्टीको राष्ट्रिय सम्मेलनसम्म ६ लाख सम्म पार्टी सदस्यता वितरणको काम सक्ने वताएका छन् । माओवादीले पुसको दोस्रो साता राष्ट्रिय सम्मेलन गर्ने निर्णय गत केन्द्रीय समितिको बैठकबाट गरेको छ ।