काठमाडौँ । प्रहरीले स्रोत नखुलेको अवैध ८० लाख रुपैयाँसहित एक व्यक्तिलाई पक्राउ गरेको छ । प्रहरी प्रधान कार्यालयका अनुसार गए राति मध्यपुर थिमी नगरपालिका १ लोकन्थलीबाट एक जनालाई पक्राउ गरेको हो ।

स्रोत नखुलेको ८० लाख रुपैयाँसहित पक्राउ पर्नेमा काठमाडौँ कोटेश्वर बस्ने बागलुङ गल्कोट नगरपालिका १० का ३६ वर्षीय चित्रबहादुर पुन मगर रहेका छन् । लोकन्थली मनहरा आँखा अस्पताल नजिक हुण्डीको कारोबार भइरहेको भन्ने खबर प्राप्त हुनासाथ महानगरीय प्रहरी वृत्त थिमीबाट खटिएको प्रहरीले मगरलाई पक्राउ गरेको हो ।

उनको साथबाट बा ४९ प ८५६५ नंको स्कुटर र नगद ३० लाखसहित बरामद गरिएको र अनुसन्धानको क्रममा उनको कोठा तलासी गर्दा थप ५० लाख बरामद गरिएको प्रहरी प्रधान कार्यालयले जनाएको छ । उनलाई आवश्यक कारबाहीका लागि सम्पत्ति शुद्धिकरण विभाग ललितपुर पठाइएको प्रहरीले जनाएको छ ।