काठमाडौं । प्रधानन्यायाधीश चोलेन्द्रशमशेर जबरा गोलाप्रथाका आधारमा पेशी तोक्न सहमत भएका छन् ।

सर्वोच्च बारका प्रतिनिधि र प्रधानन्यायाधीश जबराबीच आइतबार भएको छलफलमा जबरा गोलाप्रथाका आधारमा सर्वोच्च अदालतको दैनिक पेशी तोक्न सहमत भएका हुन् ।

गोला प्रथाको आधारमा वा स्वचालित प्रणालीबाट पेशी तोक्नुपर्ने लगायतको माग राख्दै नेपाल बार एशोशिएसनले शुक्रबार प्रधानन्यायाधीसलाई १५ दिनको अल्टिमेटम दिएको थियो ।

सर्वोच्च बारका प्रतिनिधि र प्रधानन्यायाधीश जबराबीच आइतबार भएको छलफलमा प्रधानन्याधीस जबराले सोमवार नै अदालतको फूलकोर्ट बैठक बोलाउन सहमत भएका छन् । भेटमा जबराले न्यायालय सुधारमा आफ्नो प्रतिवद्धता पनि जनाएका छन् ।

मंगलबारदेखि गोला राख्दा नमुनाको ट्रायल गर्ने सो क्रममा बार अध्यक्षसमेत रहने त्यसलगत्तै अटोमेसनको ट्रायल हुने भएको छलफलपछि बार महासचिव लीलामणि पौडेलले जानकारी दिए ।

मन्त्रालय भागबण्डाको कुरामा पनि आफूले विवाद आएपछि जेठानलाई नबनाइदिन आग्रह गरेको पनि बार पदाधिकारीसमक्ष स्पष्टीकरण दिएको पौडेलले बताए । आफूले सिफारिस नगरेको र आफ्नो नाम जोडिने भएपछि मन्त्री नबनाउने आफूले भनेको प्रधानन्यायाधीस जबराले बताएका छन् ।

प्रधानन्यायाधीस राणाले न्यायालयको समस्य विगतदेखि नै थुप्रिदै आएकाले त्यसलाई सुधार्न आफूले प्रयत्न गर्ने प्रतिवद्धता जनाएको पनि बार महासचिव पौडेलले बताए ।

बार अध्यक्ष चण्डेश्वर श्रेष्ठले २०७६ विचौलिया तथा भ्रष्टाचार रोक्ने लगायतका वैसाखदेखि आफूहरुले उठाएका विषयहरुकाबारेमा छलफल गरेको बताए ।

खासगरी न्याय पालिकाभित्रको न्याय प्रसासन र न्याय सम्पादनमा पारदर्शी हुनुपर्ने तथा जनताको मुद्दा समयमा फछ्र्यौट हुनेपर्ने तथा आफूखुशी इजलास गठन रोकिनुपर्नेमा आफूहरुले कुरा उठाएको श्रेष्ठले बताए ।

‘गोलाप्रथा (राफेल) प्रणाली भाद्र १६ बाट भनेर प्रधानन्यायाधीसले भन्नुभएको थियो तर अहिले बल्ल भोलि पूर्ण बैठक राखेर पर्सिबाट लागू गर्ने कुरा आएको छ’, श्रेष्ठले भने, ‘नेतृत्वले चाहे सुधार हुन्छ । बिचौलिया रोक्ने कुरा पनि हामी भोलिको पूर्ण बैठका उठाउँदैछौं ।’

आफूहरुले प्रधानन्यायाधीसको राजीनामा नमागेको र राजीनामा दिएर मात्रै समाधान हुने भएमा मात्रै राजीनामा मागिने श्रेष्ठको भनाइ थियो ।