काठमाडौँ । प्रमुख सत्तारुढ दल नेपाली कांग्रेसले १८ भदौबाट पार्टीको सबैभन्दा तल्लो तह वडाको अधिवेशन गरेर पार्टीको १४ औं महाधिवेशन सुरु गरेको छ । त्यसपछिका करिब दुई महिना सकिन लाग्दासम्म अधिवेशनमा उल्लेख्य प्रगति भएको छैन ।

पार्टीको निर्वाचन समितिका अनुसार अहिलेसम्म १३ जिल्लाको अधिवेशन सम्पन्न भएको छ । दसैं अगाडि एउटा प्रतिनिधि सभा निर्वाचन क्षेत्र भएका २१ जिल्लामा जिल्ला अधिवेशन सम्पन्न गर्ने निर्णय पार्टीको निर्वाचन समितिले गरे पनि त्यो सम्भव हुन सकेन । निर्वाचन समितिका अनुसार ताप्लेजुङ, संखुवासभा, रामेछाप, दोलखा, गोरखा, मनाङ, मुस्ताङ, पूवीरुकुम, कालिकोट, मुगु, हुम्ला, बझाङ र बाजुरामा जिल्ला अधिवेशन सम्पन्न भएको छ ।

२१ बाहेकका जिल्लामा दसैं अगाडि कम्तिमा पालिका अधिवेशन सम्पन्न गर्ने भनिएको थियो । तर वडा र पालिका अधिवेशन सम्पन्न हुन अझै १३ जिल्ला बाँकी छन् । निर्वाचन समितिका अनुसार सप्तरी, सिराहा, धनुषा, महोत्तरी, सर्लाही, रौतहट, बारा, पर्सा, रसुवा, बाँके, सुर्खेत, डोल्पा र कैलालीमा वडा र पालिका अधिवेशन हुन सकेको छैन । यी मध्य केही जिल्लामा सुरु भए पनि केही जिल्लामा सुरु नै भएको छैन ।

त्यतिमात्रै होइन दुई जिल्लामा त क्रियाशील सदस्यता विवाद नै नटुंगिएकाले टुंगिने कहिले र अवा अधिवेशन सुरु हुने कहिले भन्ने निधो छैन । रौतहट र रसुवामा क्रियाशील सदस्यता विवाद नटुंगिएको हो ।

अहिलेसम्म वडा र पालीका अधिवेशन ५१ जिल्लामा सम्पन्न भएको निर्वाचन समितिले जनाएको छ । निर्वाचन समितिको रेकर्ड अनुसार अझै २६ जिल्लामा वडा र पालिका अधिवेशन सम्पन्न हुन बाँकी छ ।

वडा, पालिका, प्रदेश सभा निर्वाचन क्षेत्र, प्रतिनिधि सभा निर्वाचन क्षेत्र, जिल्ला, प्रदेश र केन्द्रको महाधिवेशन गर्ने कांग्रेसको विधानमा व्यवस्था गरिएको छ । तर, अहिलेसम्म २६ जिल्लामा वडा अधिवेशन नै सम्पन्न नभएकाले आगामी ९ देखि १३ मंसिरसम्म कांग्रेसको १४ औं महाधिवेशन हुने अनिश्चित प्राय भइसकेको छ ।

कतिपय जिल्लामा राजनीति इखका कारण विवाद झिकिएको छ भने केहीमा सैद्धान्तिक पनि छन् ।