काठमाडौँ । नेपाल टेलिकमको कर्पोरेट युजर ग्रुप–सीयूजी सेवामा आबद्ध हुने ग्राहकहरुको संख्यामा वृद्धि हुने क्रम जारी छ । कुनै संस्था/कार्यालयमा आबद्ध न्यनतम दशजना मोबाइल प्रयोगकर्तालाई सीयूजी समूहमा आबद्ध गराउन यो सुविधा ल्याईएको नेपाल टेलिकमले जनाएको छ ।

सीयूजी सेवामा आबद्ध सदस्यहरुबीच निःशुल्क रुपमा अनलिमिटेड भ्वाइस कल गर्न, सस्तो दरमा डाटा चलाउन र एसएमएस पठाउन सकिन्छ भने सीयूजीमा आबद्ध नभएका नेपाल टेलिकमको नेटवर्क भित्रका अन्य नम्बरमा कुराकानी गर्न सकिने सेवा हो ।

कर्पोरेट गु्रपमा आबद्ध सदस्यहरुको आवश्यकतालाई दृष्टिगत गरी २०० रुपैयाँ, ५००, १००० र १५०० रुपैयाँ दरका विभिन्न सीयूजी प्याकेजहरु उपलब्ध गराउने टेलिकमको सेवा छ ।

कम्पनीले उपलब्ध गराईरहेको यस सेवामा प्रिपेड मोबाइलका ग्राहकले २०० रुपैयाँको प्याकेज अन्तर्गत यो पहिलेदेखि नै उपलब्ध अनलिमिटेड कल बाहेक १०० मिनेट अन नेट (नेपाल टेलिकमको नेटवर्कमा प्रयोग गर्न सकिने) र १० मिनेट अफ नेट (अन्य नेटवर्कमा समेत प्रयोग गर्न सकिने) भ्वाइस सुविधा तथा ५० वटा अन नेट एसएमएस सुविधाका साथै जुनसुकै समयमा प्रयोग गर्न सकिने १ जीबी डाटा सुविधासमेत थप उपलब्ध गरिएको छ ।

त्यस्तै पोस्टपेड मोबाइलका ग्राहकले ५०० रुपैयाँको प्याकेज लिएमा पहिलेदेखि नै उपलब्ध समूहभित्रको अनलिमिटेड कलका साथै ५०० मिनेट अन नेट र ५० मिनेट अफ नेट भ्वाइस सुविधा तथा १०० वटा अन नेट एसएमएस र ३० वटा अफ नेट एसएमएस सुविधाका साथै जुनसुकै समय प्रयोग गर्न सकिने ५ जीबी डाटा सुविधासमेत उपलब्ध गराएको टेलिकमले जनाएको छ ।

यी दुई बाहेक पोस्टपेड मोबाइलका ग्राहकले १,००० र १,५०० रुपैयाँका अन्य प्याकेज समेत प्रयोग गर्न सक्दछन् । १,००० रुपैयाँको प्याकेज अन्तर्गत सीयूजी गु्रपभन्दा बाहिर कम्पनीकै नेटवर्कमा बिहान ७ बजेदेखि बेलुकी ७ बजेसम्म अनलिमिटेड कल वा मासिक जम्मा १००० मिनेट कल गर्न सकिन्छ भने अन्य नेटवर्कमा १०० मिनेट कल गर्न सकिन्छ । साथै यस प्याकेजमा १० जीबी डाटा चलाउन र २०० वटा एसएमएस पठाउन सकिन्छ ।

यसैगरी १५०० रुपैयाँको प्याकेज अन्तर्गत सीयूजी ग्रुपभन्दा बाहिर कम्पनीकै नेटवर्कमा बिहान ७ बजेदेखि बेलुकी ७ बजेसम्म अनलिमिटेड कल गर्ने सुविधा वा मासिक जम्मा १५०० मिनेट कल गर्न सकिने सेवा लिन सकिन्छ ।

यस प्याकेजमा अन्य नेटवर्कमा २०० मिनेट कलका अतिरिक्त २० जीबी डाटा चलाउन र ४०० वटा एसएमएस पठाउन सकिन्छ । कुनै संस्था÷कार्यालयले ग्रुपमा सहभागी गराउनु पर्ने मोबाइल नम्बर र प्राप्त गर्न चाहेको प्याकज उल्लेख गरिएको पत्रसहित कम्पनीको ग्राहक सेवा केन्द्रमा सम्पर्क गर्नुपर्छ ।

न्यूनतम १० जना प्रिपेड÷पोष्टपेड मोबाइल प्रयोगकर्ता समेटी आधिकारिक रुपमा कम्पनीलाई जानकारी गराएपछि तोकिएका ग्राहकलाई सीयूजी प्याकेज उपलब्ध गराइने कम्पनीको दाबी छ ।