काठमाडौं । साताको पहिलो कारोबार दिन आइतबार शेयर बजार ५५.५० अंकले वृद्धि भएको छ । अघिल्लो दिनको नेप्से परिसूचक १.९९ प्रतिशतले वृद्धि भएर २८३७.६१ विन्दुमा रोकिएको हो ।

कूल २३२ कम्पनीको ८१ हजार ९३५ कारोबारबाट ७ अर्ब ८२ करोड ३२ लाख २६ हजार ४ सय ९३ रुपैयाँ बराबरका १ करोड ३८ लाख ९९ हजार कित्ता शेयर किनबेच भएको स्टक एक्सचेञ्जले जनाएको छ ।

कारोबारमा आएका १३ समूहमध्ये बैंकिङ समूहको परिसूचक घटेको छ भने बाँकी सबै समूहको परिसूचक वृद्धि भएको छ । बैंकिङ समूह ०.१६ प्रतिशतले घटेको छ । सर्वाधिक परिसूचक वृद्धि विकास बैंक समूहको ६.५४ प्रतिशतले भएको छ ।

आज ६ वटा कम्पनीको शेयर मूल्य १० प्रतिशतले वृद्धि भएको छ । सर्वाधिक मूल्यको शेयर खरिद विक्री आँखुखोला जलविद्युत कम्पनी लिमिटेडको ३१ करोड ५७ लाख रुपैयाँको भएको छ ।

त्यसैगरी दोस्रोमा नविल बैंक लिमिटेडको २८ करोड ३ लाख रुपैयाँको कारोवार भएको छ ।