काठमाडौं । नेकपा (माओवादी केन्द्र)ले निर्वाचन केन्द्रित तयारी थालेको छ । पार्टीको राष्ट्रिय सम्मेलन तथा निर्वाचनलाई केन्द्रित गरी भएका निर्णयहरु मातहतका कमिटीहरुलाई पठाइएको छ ।

माओवादी अध्यक्ष प्रचण्डको उक्त परिपत्रअनुसार सुदूरपश्चिम प्रदेशको विवाद अझै नटुंगिएको स्पष्ट छ ।

सुदूरपश्चिम प्रदेशको किचलो मिलाउन तत्कालै बैठक गरेर छलफल चलाउने माओवादी केन्द्रको कात्तिक २३ गतेको स्थायी कमिटी बैठकले निर्णय गरेको उक्त परिपत्रमा उल्लेख छ ।

स्थायी समितिको उक्त बैठकले सुदूरपश्चिम प्रदेशका केन्द्रीय समिति सदस्यहरुसँग तत्काल बैठकको आयोजना गरी छलफल गर्ने निर्णय भएको भनी पार्टी प्रदेश समितिलाई पठाइएको परिपत्रमा छ ।

परिपत्रअनुसार पार्टीको बाग्मति प्रदेशका अध्यक्ष नारायण दाहाललाई सह–इन्चार्ज र अध्यक्ष दुवै हुने ब्यवस्था गरिएको छ ।

वडा सम्मेलन गर्दा वडा आयोजक समितिले वडाको इतिहास, वडा संगठनको अवस्था, वडामा राजनीतिक सैद्धान्तिक विकास गर्ने तथा सबै सदस्यहरुलाई श्रम, रोजगार र उत्पादनमा सहभागी हुने योजना एवम् सामाजिक र सांस्कृतिक रुपान्तरणको अभियानात्मक योजनासहितको राजनैतिक, सांगठनिक एवम् कार्यक्रमिक योजनासहितको प्रतिवेदन प्रस्तुत गर्न निर्देश गर्ने निर्णय पनि स्थायी समितिले गरेको छ ।

पाँच दलीय समन्वय समितिमा पार्टीको तर्फबाट अध्यक्ष पुष्पकमल दाहाल ‘प्रचण्ड’ र स्थायी समिति सदस्य नारायणकाजी श्रेष्ठलाई पठाउने निर्णय गरिएको सर्कुलरमा उल्लेख छ ।

माओवादीले पार्टीको आगामी राष्ट्रिय सम्मेलनका लागि प्रदेशहरुबाट ६ सय प्रतिनिधिबाट बढाएर ८ सय कायम गरेको छ ।

स्थायी समितिले सबै सम्मेलन तथा अधिवेशनहरुमा पार्टीको मूल कार्यदिशा पार्टी केन्द्रीय समितिको २०७८ साउन ३० र ३१ गते सम्पन्न राजनीतिक प्रतिवेदनलाई आधार मानेर छलफल चलाउन भनी मातहतका कमिटीहरुलाई परिपत्र गरेको छ ।

हेर्नुहोस्, यस्तो छ परिपत्रः