काठमाडौँ । नेपाली कांग्रेस चितवनको अधिवेशन बुधबारदेखि सुरु हुने भएको छ । पहिलो दिन उद्घाटन र मनोनयन हुने छ भने मंसिर १८ गते निर्वाचन गर्न सिफारिस गरिएको छ ।

कांग्रेस चितवन कार्य समितिको आइतबार बसेको बैठकले निर्वाचन समितिलाई अधिवेशनको मिति सिफारिस गरेको जिल्ला सचिव उत्तम जोशीले जानकारी दिए ।

मंसिर १५ देखि १७ गतेसम्म बागमती प्रदेश समितिको निर्वाचन प्रक्रिया हुने भएकाले १८ गते मात्र पार्टीको जिल्ला कार्य समितिको निर्वाचन गर्न लागिएको हो । यही मंसिर ११ गते निर्वाचन गर्ने भनिएकामा नेकपा एमालेको राष्ट्रिय महाधिवेशनका कारण आवास र आवतजावतको समस्या हुने भन्दै स्थगित गरिएको थियो ।

आज बसेको बैठकले अधिवेशन सम्पन्न गर्न विभिन्न समिति गठन गरेको छ । कांग्रेसको विधानमा जिल्ला सभापतिका लागि ५० प्रतिशतभन्दा बढी मत ल्याउनु पर्ने भएकाले दोस्रो चरणमा निर्वाचन गर्नु पर्ने हुन्छ । यसका लागि कम्तीमा तीन दिन लाग्ने बताइएको छ । सभापति पदका ६ प्रत्यासी छन् ।