काठमाडौं । नेपाली कांग्रेसको १४ औँ महाधिवेशनमा वरिष्ठ नेता रामचन्द्र पौडेल पार्टी नेतृत्वको प्रतिष्पर्धाबाट बाहिरिएका छन् ।

संस्थापन इतर पक्षका नेता पौडेलले अन्तिम समयसम्म पनि आफ्नो समूहलाई मिलाउन नसकेपछि आफै प्रतिष्पर्धाबाट बाहिरिए । उनी पक्षका नेता प्रकाशमान सिंह र डा. शेखर कोइरालाले छुट्टाछुट्टै टिम बनाएर प्रतिष्पर्धामा उत्रिए ।

आफ्नो पक्षको यसअघिका पटक पटक भेलामा उनले आफू छाड्न तयार भएको तर एक जना उम्मेदवार बनाउनका लागि आग्रह गरेका थिए । सहमति नजुटेपछि उनले आफू राजनीतिबाटै सन्यास लिने समेत बताएका थिए ।

केन्द्रीय सदस्य पदमा समेत उम्मेदवारी नदिएपछि पौडेल कांग्रेसमा अब कस्तो भूमिकामा रहलान् भन्ने प्रश्न उब्जिएको उनी निकटका नेताहरुले बताएका छन् ।

आफ्नो टिम नमिले पनि पौडेलले अन्ततः सभापतिमा उम्मेदवारी दिने गरी नै प्रचारसामग्रीहरु तयार पारेका थिए । उनले टोपीदेखि माक्समा समेत आफ्नो तस्वीर छपाएका थिए ।

पौडेलले आफ्नो पक्षकालाई मिलाउन नसकेपछि पार्टीको चार वर्षे कार्यकालको नयाँ भूमिकाबाट बाहिर हुने भएका छन् । आगामी दिनमा संस्थापन इतर पक्षमा रहेर उनले विरोधका श्वरहरु गुञ्जाउन सक्नेछन् । तर पौडेललाई उनी पक्षकै नेता कार्यकर्ताले नटेरेपछि राजनीतिक भविष्य कमजोर बन्ने देखिएको छ ।

नेपाली कांग्रेसको अलग समूह भनेर चिनिएका पूर्वमहामन्त्री कृष्णप्रसाद सिटौलाले पनि जारी १४ औं महाधिवेशनमा पदमा उम्मेदवारी दिएनन् ।

तर उनले संस्थापन पक्षलाई फुटाएरै भए पनि आफ्नो पक्षका प्रदीप पौडेललाई महामन्त्रीको उम्मेदवार बनाउन सफल भएका छन् ।

सिटौला आफू टिममा नरहे पनि प्रदीप महामन्त्री बन्न सफल भए भने पनि सिटौलाका लागि जीत हुनेछ । उनले आगामी दिनमा पौडेलको सारथि बनेर बाहिरबाटै सहयोग गर्नुपर्ने अवस्था आउनेछ ।