काठमाडौं । नेपाली कांग्रेसको इतिहासमै पहिलो पटक निवार्चित उपसभापतिमा पुर्ण बहादुर खड्का र धनराज गुरुङ विजयी भएका निर्वाचन समितिले घोषणा गरेको छ । नेपाली कांग्रेसको १४ आंै महाधिवेशनदेखि उपसभापतिमा निर्वाचन भएको हो । यसअघि उपसभापति मनोनित हुने गरेको थियो ।

कसको कति मत ?

निर्वाचन समितिका अनुसार खड्काले दुई हजार १२१ मत ल्याए भने गुरुङले एक हजार ९०८ मत ल्याए । गुरुङ शेखर कोइराला समुहका हुन् । भने खड्का सभापति शेरबहादुर देउवा समुहका हुन् ।

खड्का र गुरुङसहित ७ जना उपसभापतिको प्रतिष्प्रर्धामा थिए । जसमा उपसभापतिका उम्मेदवार चन्द्र भण्डारीले ५८० मत पाएका छन् ।
प्रकाशमान सिंह समुहबाट उपसभापतिमा मैदानमा उत्रेकी सुजाता कोइरालाले ६४४ मत ल्याएकी छिन् ।

महेश आचार्यले ५८९ मत ल्याए । बिमलेन्द्र निधि समुहबाट उपसभापतिमा उम्मेदवार बनेकी दिब्यश्वरी शाहले १३२ मत प्राप्त गरेकी छिन् ।
गत सोमबार भएको मतदानमा उपसभापतिमा ४ हजार ६ सय ७९ मत खसेको थियो ।महामन्त्री पदको मतगणना बिहीबार बिहान हुने निर्वाचन समितिले जनाएको छ ।