काठमाडौं । संघीय संसदको बैठक बुधबार पनि बस्दैछ ।

प्रतिनिधिसभाको बैठक आज दिउँसो १ बजेका लागि बोलाइएको छ । संसदको दशौं अधिवेशन चलिरहँदा प्रमुख प्रतिपक्षी दल नेकपा (एमाले)ले संसदमा विरोध गर्दै आएको छ भने संसद बाहिरका दलहरुले सडक आन्दोलन जारी राखेका छन् ।

संसदको जारी अधिवेशनमा अमेरिकी सहयोग परियोजना (एमसीसी) पेश हुने आशंकामा विभिन्न साना दलहरु आन्दोलनले सडक आन्दोलन चर्काइरहेका छन् । प्रतिनिधिसभाको आजको बैठकमा चार वटा अध्यादेश पेस गर्ने उल्लेख छ ।

एमालेको विरोध र नाराबाजी चलिरहँदा चालु १० औँ अधिवेशनको पहिलो बैठकमा पेस भएका ६ वटा र दोस्रो बैठकमा पेस भएका दुई अध्यादेशलाई बहुमतले स्वीकृत गरेको थियो ।

एमालेको नाराबाजीकाबीच मंगलबारको प्रतिनिधिसभा बैठकबाट दुई वटा अध्यादेश स्वीकृत गरिएको थियो ।

मंगलबार कानुन, न्याय तथा संसदीय मामिलामन्त्री दिलेन्द्रप्रसाद बडुले प्रस्तुत गर्नु भएको यौन हिंसाविरुद्धका केही ऐनलाई संशोधन गर्ने अध्यादेश २०७८ र फौजदारी कसुर तथा फौजदारी कार्यविधि सम्बन्धि केही ऐन संशोधन गर्ने अध्यादेश स्वीकृत गरिएको थियो ।