कैलाली । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले देशमा लोकतन्त्रलाई लुटतन्त्र परिणत भइरहेको आरोप लगाएका छन् । बिहीबार धनगढीमा आयोजित पार्टीको प्रदेश स्तरीय आम सभालाई सम्बोधन गर्दै उनले यस्तो बताएका हुन ।

अहिलेका ठूला दलहरु लुटतन्त्रको विरोध गर्दा आतिएर राप्रपा प्रतिगमनको प्रचार गरिरहेको बताए । अहिलेका राजनीतिक दलले देश लोकतन्त्रको नाममा लुटतन्त्र मच्चाइरहेको उनको आरोप छ । राप्रप लोकतन्त्रप्रति पूर्ण वफादार भएको उनले बताए ।

‘राप्रपा लोकतन्त्रप्रति पूर्ण बफादार रहेको छ, तर लोकतन्त्र र गणतन्त्रको नाममा भइरहेको लुटतन्त्र सहेर बस्नेवाला छैन,’ उनले भने । कांग्रेस र कम्युनिष्ट मिलेर देशलाई ३३ वर्षदेखि बन्धक बनाएको उनको आरोप छ ।

‘यसो सबै तिर हेर्दा सामान्य जस्तो लाग्छ, प्रदेशस्तरी सभालाई सम्बोधन गर्दै उनले भने । ‘सामान्य अवस्था छैन, ३३ वर्षदेखि देश कांग्रेस, कम्युनिष्टको हातमा बन्धक छ,’ उनले भने, ‘कांग्रेस र कम्युनिस्टको विकल्प खोज्न आवश्यक भएको छ, अब हुने स्थानीय तह, प्रदेश र प्रतिनिधि सभाको निर्वाचनमा जनताले राजनीतिक दलसँग बदला लिने मौका आएको छ ।’

उनले राजसंस्था र हिन्दूराष्ट्र देशको आवश्यकता रहेको दाबी गरे । ‘हामीले देशको लागि राजतन्त्र र हिन्दु राष्ट्रको कुरा उठाएको हो’, उनले भने, ‘भोटको लागि होइन ।’

‘राजनीतिलाई पैसा कमाउने सजिलो माध्याम बनाएका छन्’, उनले भने, ‘भ्रष्ट्राचार माथिदेखि तलसम्म संस्थागत भएर गएको छ ।’

भष्ट्राचार भएको काण्डहरु ललिता निवास जग्गा प्रकरणदेखि वाइडबडीसम्म देशका सबै ठूला राजनीति दलहरुको संलग्ता रहेको उनको भनाई छ । ‘यो भष्ट्राचार काण्डमा निर्णय गर्ने ठाउँमा प्रधानमन्त्री, मन्त्रीहरुलाई कारबाहीबाट चोखिने र चोख्याउने काम भइरहेको छ’, उनले भने ।

अहिले केही कर्मचारीहरुलाई कारबाहीको नाटक गरेर राजनीतिक दलका नेताहरुलाई उन्मुक्ति दिने काम भइहरहेको उनले बताए ।