काठमाडौँ । बेमौसमी वर्षाले रुपन्देहीका इँटा उद्योगमा बनाइएका आठ करोड मूल्य बराबरको काँचो इँटा नष्ट भएको छ । लुम्बिनी इँटा व्यवसायी संघ भैरहवाका अनुसार गत हप्ता परेको वर्षाले रुपन्देहीका ४७ वटा इँटा उद्योगका आठ करोड मूल्य बराबरको इँटा गलेर नष्ट भएको हो ।

वर्षाका कारण जिल्लाका सबै इँटा उद्योगमा क्षति पुगेको लुम्बिनी इँटा व्यवसायी संघले जनाएको छ । यी उद्योगमा रहेका तीन करोड २५ लाख गोटा काँचो इँटा नष्ट भएको उद्योगीहरूको भनाइ छ । वर्षाका कारणले गलेर इँटा नष्ट हुँदा अहिले मात्रै रु आठ करोडभन्दा बढीको नोक्सानी इँटा व्यवसायीहरूलाई भएको प्रारम्भिक अनुमान गरिएको इँटा व्यवसायी संघ लुम्बिनीका महासचिव अजयकुमार गुप्ताले बताए ।

अहिलेको वर्षाले एउटा भट्टामा कम्तीमा दुई लाखदेखि १० लाखसम्म काँचो इँटा गलेर नोक्सानी भएको उनको भनाइ छ । काँचो इँटाको बीमा पनि नहुने भएकाले राज्यले संरक्षण गर्न जरुरी रहेको व्यवसायीहरुको माग रहेको छ । रुपन्देहीमा उत्पादन हुने इँटाहरू जिल्लासँगसँगै पाल्पा र स्याङ्जामा बिक्री हुने गरेको छ ।

मंसिरदेखि वैशाखसम्म इँटा उत्पादन हुने समय भएको र त्यसपछिको छ महिनासम्म वर्षा मौसममा यो उद्योग बन्द रहने गर्दछ । बेमौसमी वर्षाका कारण काँचो इँटा गलेर नष्ट भए पनि बजारमा इँटाको अभाव हुन नदिन आफूहरू लागिपरेको संघले जानकारी दिएको छ ।

अब नयाँ इँटा उत्पादन हुन एक महिना ढिलाइ हुने देखिएको छ । रुपन्देहीमा सञ्चालित इँटा उद्योगमा करिब रु १० अर्ब लगानी छ भने आठ हजारभन्दा बढी मजदुर कार्यरत छन् ।