काठमाडौं । नेकपा (एकीकृत समाजवादी)का अध्यक्ष माधवकुमार नेपालले तीन तहकै निर्वाचन एकै पटक गर्नुपर्नेमा जोड दिएका छन् ।
बुधबार पार्टी कार्यालय शान्तिनगरमा आयोजित पार्टी प्रवेश कार्यक्रममा बोल्दै उनले तीनै तहको निर्वाचन एकै पटक गरेर खर्च गर्नुपर्नेमा जोड दिए ।
‘एउटा चुनाव गराउँदा झन्डै ५ अर्ब रुपैयाँ खर्च हुन्छ । यो भन्दा पहिला ५ चरणमा चुनाव भएको थियो । त्यसमा झन्डै २५ अर्ब रुपैयाँ खर्च भएको थियो । यदी एकै चरणमा गर्ने हो भने ५ देखि १० अर्बमा चुनाव सकिन्छ । उम्मेदवारको पनि खर्च कम हुन्छ । त्यसका निम्ति हामी छलफल चलाइरहेका छौँ ।’– नेपालले भने ।

यस्तै, उनले स्थानीय तह, प्रदेशसभा र प्रतिनिधिसभाको निर्वाचन संविधानलाई सर्वोपरि राखेर सम्पन्न गर्नुपर्ने बताएका छन् ।

सत्ता गठबन्धन दलहरु नै स्थानीय तहको निर्वाचनकाबारेमा स्पष्ट नभएको भन्दै छलफलमा रहेका छन् । गठबन्धन दलहरु संविधान र निर्वाचन कानून बाझिएको भन्दै छलफल गरिरहँदा नेता नेपालले संविधानअनुसार अघि बढ्नुपर्ने बताएका छन् ।

नेपालको संविधानमा स्थानीय तहको निर्वाचन सम्पन्न भएको ६ महिनाभित्र निर्वाचन गर्नुपर्ने उल्लेख छ भने निर्वाचन ऐनमा समयअवधि अघि नै निर्वाचन गर्नुपर्ने भनिएको छ ।

निर्वाचन आयोगले पनि पद रिक्त नहुँदै निर्वाचन गर्नुपर्ने भन्दै तत्काल निर्वाचनको मिति घोषणा गर्न सरकारलाई दबाब दिएको छ । तर गठबन्धन दलका नेताहरु भने स्थानीय तहको निर्वाचन ६ महिना पछाडि धकेल्ने योजनामा छन् ।

गठबन्धनले १९ सिट नै जित्ने दाबी
एकीकृत समाजवादी अध्यक्ष नेपालले बुधवार जारी १९ रिक्त राष्ट्रियसभा निर्वाचनबाट सबै सिट गठबन्धनले जित्ने दावी गरेका छन् ।

बुधबार भएको राष्ट्रियसभाको रिक्त पदमा सत्ता गठबन्धन पाँच दल मिलेर लडेका छन् भने प्रमुख प्रतिपक्षी दल एमाले प्रतिष्पर्धामा छ ।

गठबन्धनबाट सातै वटा प्रदेशमा भएको निर्वाचनमा नेपाली काँग्रेसको ६ जना, एकीकृत समाजवादी र माओवादी केन्द्रबाट ५÷५ जना, जनता समाजवादी पार्टीबाट २ र राष्ट्रिय जनमोर्चाबाट १ जनाको उम्मेदवारी परेको छ ।