काठमाडौं । पशुपति धर्मशालामा होटेल सञ्चालन गरिरहेको होटेल आनन्द प्रालि (बतास समूह)ले एक वर्षदेखि नतिरिरहेको भाडा एकैपटक वुझाएको छ । सरकारले होटल सञ्चालन सम्झौता नै खारेज गर्ने प्रक्रिया अगाडी वढाएपछि रातारात वतास समुहले आफुले सम्झौता अनुसारको बाँकी तिर्नुपर्ने रकम एकैपटक वुझाएको हो ।

बतासले एक वर्षदेखि त्यहाँको भाडा नवुझाएको पर्यटन मन्त्रालयले गठन गरेको छानबिन समितिले औल्याएको थियो ।

बतासले सस्तो मूल्यमा धर्मशाला प्रयोग गरेबापत मासिक आठ लाख ७८ हजार चार सय ६८ रुपैयाँ तिर्ने सम्झौता गरेको थियो । तर त्यो सम्झौता अनुसारको पनि एक वर्षको रकम होटलले तिर्न बाँकी नै रहेको पर्यटन मन्त्रालयको छानविन समितिले औल्याएपछि मन्त्री प्रेम आले उक्त सम्झौता खारेजीको प्रक्रियामा लागेका थिए ।

नारायणहिटी देखि पशुपतिको धर्मशाला सम्ममा बतास समुहले सस्तो मूल्यमा कमिसनको चक्करमा काम गदै आएको थियो । नारायणहिटीको सम्झौता खारेज गरेर अगाडी वढेका मन्त्री प्रेम आलेले छानविन समितिको प्रतिवेदनका आधारमा पशुपति धर्मशालाको सम्झौता पनि खारेजीको प्रक्रिया अगाडी वढाएपछि बतासले रातारात आफुले तिर्न वाँकी रकम तिरेको हो ।

उसले झण्डै एक करोडका भाडा एकैपटक वुझाएको छ । पर्यटन मन्त्रालयले गठन गरेको छानबिन समितिले होटेलले करिब एक वर्षको ९९ लाख ८४ हजार ६ सय ६६ रुपैयाँ भाडा असुलउपर गर्न बाँकी रहेको औँल्याएको थियो ।

पशुपति क्षेत्र विकास कोषका कोषाध्यक्ष नारायणप्रसाद सुवेदीको संयोजकत्वमा २३ पुसमा गठित छानबिन समितिले ३ माघमा संस्कृति मन्त्रालयलाई प्रतिवेदन बुझाएको थियो । बुधबार उक्त रकम कोषको खातामा जम्मा भएको कोषाध्यक्ष सुवेदीले जानकारी दिए । ‘असुलउपर गर्न बाँकी रकम कोषको खातामा जम्मा भएको छ, भौचर पनि कार्यालयमा आएको छ,’ उनले भने ।

धर्मशाला प्रयोग गरेबापत मासिक आठ लाख ७८ हजार चार सय ६८ रुपैयाँ र वार्षिक एक करोड पाँच लाख ४१ हजार ६ सय १८ रुपैयाँ कायम गरेकोे, सम्झौता हाल १० वर्षको हुने र पछि पाँच वर्ष थप गर्ने उल्लेख रहेको र धर्मशालाबाट कोषले भुक्तानी पाउनुपर्ने भाडा करिब एक वर्षदेखिको ९९ लाख ८४ हजार ६ सय ६६ रुपैयाँ बाँकी देखिएको प्रतिवेदन वुझाएको थियो ।

बतास समुहले भने कोभिडका कारण भाडा मिनाह गर्नुपर्ने अडान राख्दै भाडा नतिरी आलटाल गरिरहेको थियो । तर मन्त्री आले बतासप्रति आक्रामक बनेर प्रस्तुत हुन थालेपछि वतासले उक्त रकम तिरेको हो ।

पशुपति क्षेत्र विकास सञ्चालक परिषद्को स्वीकृतिविना नै धर्मशाला लिजमा दिइएको छानबिनबाट खुलेपछि सरकारले सम्झौता खारेजीको प्रक्रिया अगाडि बढाएको छ ।

परिषद्को मंगलबारको बैठकले कोषका सदस्यसचिव डा मिलनकुमार थापा, सञ्चालक परिषद् सदस्य देवीप्रसाद बराल र पर्यटन मन्त्रालयका सहसचिव डा टोकराज पाण्डेसहितको तीन सदस्यीय समिति गठन गरिसकेको छ । समितिले होटेल आनन्द प्रालिसँग स्पष्टीकरण लिएर सम्झौता खारेजीको औपचारिक निर्णयकोे म्यान्डेट पाएको छ ।

त्यसपछि नै बतासले आफनो सम्झौता खारेजीबाट जोगिनका लागि रातारात वाँकी रकम चुक्ता गरेको हो ।