काठमाडौं । बागमती प्रदेश सरकारले कृषक, लघु उद्योगी व्यवसायी र नवप्रवर्तकलाई सहुलियतपूर्ण कर्जा कार्यक्रममा सहभागी हुन अनुरोध गरेको छ ।

प्रदेशको आर्थिक मामिला तथा योजना मन्त्रालयले सूचना जारी गर्दै सो कार्यक्रममा सहभागी हुन अनुरोध गरेको हो । कृषि, उद्योग, पर्यटन प्रवर्दन, व्यापार व्यवसाय, वन तथा वातावरण, महिला तथा दलित समुदायको विकास र फोहोरमैला व्यवस्थापनमा ऋण दिने आर्थिक मामिला मन्त्रालयले जनाएको छ ।

सहुलियतपूर्ण कर्जाका लागि बागमती प्रदेश भित्रका कृषि विकास बैंकका शाखा कार्यालयहरु तथा साना किसान विकास लघुवित्त वित्तीय संस्थामा आवेदन दिन सकिने सूचनामा उल्लेख छ ।

यसरी लिएको सहुलियतपूर्ण कर्जाको वार्षिक ३ प्रतिशतभन्दा बढी ब्याज तिर्न नपर्ने मन्त्रालयले जनाएको छ । कोभिड–१९ का कारण सिथिल भएको कृषि, उद्योग, व्यापार व्यवसायसँग सम्वन्धित क्षेत्रमा उत्पादन तथा रोजगारी सिर्जनाका लागि ५ वर्षसम्मका लागि अधिकतम १० लाख रुपैयाँसम्म ऋण दिन सकिने सूचनामा उल्लेख छ ।

प्रदेश सरकारले सहुलियतपूर्ण कर्जाका लागि चालु आर्थिक वर्ष ३ अर्ब रुपैयाँ बजेट विनियोजन गरेको थियो । थप जानकारी तलको सूचनामा हेर्नुहोला ।