काठमाडौं । चीनले तिब्बतमा मेगा बाँध निर्माणको योजना अघि सारेको छ । नयाँ बाँध परियोजना बनाउन चीनले आवश्यकतानुसार रकम खर्च गर्ने तयारी गरेको छ ।

तिब्बतको मेदोङ काउन्टीमा निर्माण हुने उक्त परियोजना थ्री गोर्जेज बाँध पछिको ठूलो हुने द इकोनोमिक टाइम्सले जनाएको छ । प्रस्तावित आयोजनाबाट प्रत्येक वर्ष ३० खर्ब युनिट बिजुली उत्पादन गर्न सकिने चीनले दाबी गरेको छ ।

भारतीय सञ्चार माध्यमका अनुसार चीनले अघि सारेको यो परियोजनाबाट वातावरणविद् र भारतमा त्रास बढेको छ ।

जलमार्ग हिमालय छोडेर भारतमा बग्नुअघि ब्रम्हपुत्र नदीको संरचना यस क्षेत्रमा विस्तार हुनेछ । १ हजार ५०० मिटरभन्दा अधिक उचाइमा विश्वको सबैभन्दा लामो र सबैभन्दा गहिरो बाँध बनाइले चीनले जनाएको छ ।

विश्वकै दोस्रो ठूलो बैहितान आयोजनाको बाँधमा पानी भर्न सुरु गरिएको छ । परियोजनाबाट १६ हजार मेगावाट बिजुली उत्पादन हुने अपेक्षा गरिएको द इकोनोमिक टाइम्सले उल्लेख गरेको छ ।

यो परियोजनालाई चीनको १४ औं पञ्चवर्षीय योजनामा अघि बढाउने उल्लेख छ । ब्रम्हपुत्रलाई तिब्बतमा यार्लुङ नामले चिनिन्छ । गत अक्टोबरमा तिब्बतको स्थानीय सरकारले जलविद्युत् आयोजनामा विशेषज्ञता गर्ने सार्वजनिक निर्माण कम्पनी पावर चाइनासँग रणनीतिक सहयोग सम्झौतामा हस्ताक्षर गरेको छ ।

याङत्जी नदीमा २२ हजार ५ सय मेगावाटको विश्वकै सबैभन्दा ठूलो थ्री गर्जेज बाँध निर्माण गरेको चीनले जिन्सा नदी मुख्य केन्द्रमा १६ हजार मेगावाट क्षमताको बैहितान जलाशययुक्त आयोजना सम्पन्न गरेको छ ।