काठमाडौं । सरकारले विभिन्न १२ वटा शहरलाई स्मार्ट सिटी बनाउने काम निरन्तर अघि बढिरहेको दाबी गरेको छ ।

शहरी विकास मन्त्रालयले विज्ञप्ति जारी गर्दै विभिन्न शहरलाई स्मार्ट सिटी बनाउने सरकारको नीति अनुसार काम भइरहेको दाबी गरेको हो ।

गत बैशाख ४ गतेको कान्तिपुर दैनिकमा बाराको निजगढ, चितवनको भरतपुर, गोरखाको पालुङटार र कैलालीको टिकापुरलाई स्मार्ट सिटीको सूचीबाट हटाएको भन्ने गरी प्रकाशित समाचार भ्रामक र कपोलकल्पित रहेको मन्त्रालयले स्पष्ट पारेको छ ।

संवेदनशील विषयमा भ्रम सिर्जना हुने गरी समाचार सम्प्रेषण नगर्न र समाचार सम्प्रेषण गर्दा सम्वन्धित निकायका अधिकारीबाट सत्य तथ्य सूचना लिन पनि मन्त्रालयले आग्रह गरेको छ । यस्तै भ्रामक समाचारको भ्रममा नपर्न पनि मन्त्रालयले सर्वसाधारणलाई आग्रह गरेको छ ।

सरकारले धनकुटा, काभ्रे उपत्यका, मिर्चैया, निजगढ, लम्बिनी, चन्द्रपुर, भरतपुर, पालुङटार, वालिङ, दुल्लु, तुलसीपुर, टिकापुर र अमरगढीलाई स्मार्ट सिटी बनाउने बताएको छ ।