काठमाडौँ । कोरोना भाइरसको संक्रमण तीव्र गतिमा बढेको भन्दै गरिएको निषेधाज्ञामा सञ्चालित खाद्यान्न तथा फलफूल तरकारी लगायतका अत्यावश्यक उपभोग्य वस्तु बोक्ने ढुवानीमा चालक र कामदारबाहेक कोही बस्न नपाउने भएका छन् ।

उद्योग, वाणिज्य तथा आपूर्ति मन्त्रालयको सक्रियतामा सोमबार बसेको निजी व्यवसायीहरूको प्रतिनिधि तथा छाता संगठनहरूको बैठकले यस्ता सवारी साधनमा आवश्यक व्यक्तिबाहेक कोही बस्न नपाउने निर्णय गरेको हो । उक्त निर्णयसँगै बैठकले अबदेखि निषेधाज्ञामा सञ्चालन हुने प्रत्येक ढुवानीका साधनले गाडीमा ढुवानीको प्रकृति उल्लेखित ब्यानर वा स्टिकर टाँस्नु पर्ने र गाडीमा कोको रहनेबारेमा समेत विवरण खुलाई जिल्ला प्रशासन कार्यालयमा पठाउनु पर्ने भएको छ ।

कोरोनाको संक्रमणका बीच निषेधाज्ञाको समयमा पनि स्वास्थ्य सुरक्षाको अधिकतम उपाय अपनाउँदै अत्यावश्यक वस्तुको आपूर्ति व्यवस्था सहज राख्न यस्तो व्यवस्था गरिएको मन्त्रालयले जनाएको छ ।