काठमाडौं । राष्ट्रिय सभाको लुम्बिनी प्रदेशतर्फबाट रिक्त पदको उपचुनाव आगामी जेठ १७ गते हुने भएको छ । निर्वाचन आयोगले जेठ १७ गते उपचुनाव गर्ने निर्णय भएको भन्दै आज मिति घोषणा गरेको हो ।

जेठ १७ गते बिहान ९ देखि अपराह्न ३ बजेसम्मका लागि मतदान समय निर्धारण आयोगले गरेको छ । नेकपा (माओवादी केन्द्र) का तर्फबाट निर्वाचित चन्द्रबहादुर खड्काले माओवादी छोडेर एमाले रोजेपछि उक्त पद माओवादीले रिक्त गराएको थियो ।

निर्वाचनका लागि आयोगले दाङको घोराहीमा रहेको प्रदेश निर्वाचन कार्यालय तोकेको छ । बाग्मतिमा भने जेठ ६ मा निर्वाचन हुँदैछ । माओवादी केन्द्रबाट निर्वाचित गृहमन्त्री रामबहादुर थापाले पनि एमाले रोजेपछि उनको पद पनि माओवादीले रिक्त गराएको थियो ।

वाग्मतीका लागि शुक्रवार उम्मेदवारी दर्ताको समय नै तोकिएको छ । एमालेले लुम्बिनीमा चन्द्रबहादुर खड्कालाई नै उम्मेदवार बनाउन लागेको छ भने विपक्षी गठवन्धन (कांग्रेस, माओवादी, जसपाको उपेन्द्र-बाबुराम समूह र माधव नेपाल समूह) ले एमाले छोडेर कांग्रेस प्रवेश गरेका दृगनारायण पाण्डेयलाई उम्मेदवार बनाउन लागेको छ ।

वाग्मतीमा एमालेले गृहमन्त्री थापा र विपक्षी गठबन्धनले माओवादीको चुनाव चिहनमा डा खिमलाल देवकोटालाई उम्मेदवार बनाउन लागेको छ ।