पाकिस्तानको राजधानी इस्लामावादमा इरानी र अमेरिकी प्रतिनिधिमण्डलबीच शनिबार रातिदेखी चलेको वार्ता आईतबार बिहानसम्म जारी छ। वार्ता लगातार १४ घन्टा चलेको अलजजिराले जनाएको छ ।

इरानका विदेश मन्त्रालयका प्रवक्ता इस्माइल बघाईले वार्ताका विषयहरूमा विभिन्न पक्षबाट छलफल भएको बताएका छन्।“पछिल्लो २४ घण्टामा मुख्य वार्ताका विषयका विभिन्न आयामहरूमा छलफल भयो, जसमा हर्मुज जलडमरू, परमाणु मुद्दा, युद्ध क्षतिपूर्ति, प्रतिबन्ध हटाउने विषय, तथा इरानविरुद्ध र क्षेत्रीय युद्धको पूर्ण अन्त्य समावेश छन्,” उनले सामाजिक सञ्जाल एक्समा लेखेका छन्।

वार्तासथलमा पहिले इरानी प्रतिनिधिमण्डल पुगेको थियो भने त्यसपछि अमेरिकी टोली पुगेको थियो। पाकिस्तानी पक्षले दुवैसँग छुट्टाछुट्टै भेटवार्ता गरेको थियो। त्यसपछि, लेबनानमा युद्धविराम र होर्मुज जलडमरूमध्यजस्ता विषयमा देखिएका मतभेदका बाबजुद पनि, दुवै पक्ष प्रत्यक्ष वार्तामा सहभागी भएका थिए।

इरानले आफ्ना रोक्का गरिएका सम्पत्तिहरू फुकुवा गर्नुपर्ने मागलाई निरन्तर रूपमा उठाउँदै आएको छ । वार्ता कक्षबाट धेरै जानकारी बाहिर नआए पनि, विभिन्न स्रोतहरूबाट प्राप्त साना–साना सूचनाहरूले उतारचढावका बीच पनि समग्र वातावरण सकारात्मक रहेको संकेत गरेका अलजजिराले जनाएको छ।

यस वार्ताको नेतृत्व अमेरिकी उपराष्ट्रपति जेडी भान्सले गरिरहेका छन्। उपराष्ट्रपति भान्ससँगै राष्ट्रपति डोनाल्ड ट्रम्पका विशेष दूत स्टिभ विट्कफ र ज्यारेड कुश्नर सहभागी छन्।इरानी टोलीको नेतृत्व इरानी विदेशमन्त्री अब्बास अराक्ची र संसदका सभामुख मोहम्मद बागेर गालिबाफले गरिरहेका छन्।

हर्मुजको जलडमरूको आवागमन , लेबनानमा युद्धविराम, आणविक मुद्दालगायतका जटील विषयमा दुई देशका आ(आफ्ना कडा अडान रहेका छन् । जसले वार्ता निकै जटील रहेको देखाउँछ ।

अमेरिकी उपराष्ट्रपति भान्सले भने- इरानसँगको वार्ता असफल भयो, अमेरिका फर्कँदैछु