काठमाडौँ । सिटिजन पोष्ट डटकमका सम्पादक दिनेश दाहालको मृत्यु भएको छ । सुमेरु अस्पतालको भेन्टिलेटरमा उपचाररत उनको शनिबार मृत्यु भएको हो ।

उनको ४० वर्षको उमेरमा कोरोना संक्रमणबाट मृत्यु भएको हो । श्वासप्रश्वासमा समस्या देखिएपछि वैशाख १० गने उनलाई सुमेरु अस्पताल धापाखेलमा भर्ना गरिएको थियो । कोरोना संक्रमणसँगै निमोनिया देखिएपछि उनलाई भेन्टिलेटरमा राखेर उपचार गरिएको थियो ।

निमोनियासँगै कोरोना संक्रमण भएकाले उनको निधन हुन पुगेको अस्पतालले जनाएको छ । उनले जनप्रहार साप्ताहिकमा समेत सम्पादक रहेर काम गरेका थिए । स्वर्गीय दाहालका श्रीमती, एक छोरा र एक छोरी छन् ।

महासंघद्वारा शोक व्यक्त

नेपाल पत्रकार महासंघ काठमाडौं शाखाका सदस्य दाहालको कोरोना संक्रमणबाट मृत्यु भएकोमा महासंघले दुःख व्यक्त गरेको छ । वैशाख १ गते कोरोना पुष्टि भएपछि घरमै आइसोलेसनमा रहेका उनलाई श्वास फेर्न समस्या भएपछि अस्पतालमा भर्ना गरिएको थियो । १५ दिनदेखि उपचाररत उनको आज बिहान उपचारको क्रममा मृत्यु भएको हो ।

महासंघले मृत्यु भएका पत्रकार दाहालप्रति श्रद्धाञ्जली अर्पण गर्दै दिवंगत आत्माको चिरशान्तिको कामना गरेको छ । कोरोनाका कारण हालसम्म ८ जना पत्रकारले ज्यान गुमाइसकेका छन् । यस्तै, ६ सय ५० भन्दा बढी पत्रकार संक्रमित भएका छन् ।