काठमाडौं । जनता समाजवादी पार्टी जसपाको महन्थ ठाकुर र राजेन्द्र महतो पक्षले आफ्नो पक्षका सांसदलाई भक्तपुरको एक रिसोर्टमा राखेको छ ।

काँग्रेस सभापति शेरबहादुर देउवालाई भेटपछि ठाकुर र महतो पक्षले आफ्नो पक्षका सांसदलाई बैठकका लागि भन्दै भक्तपुरको रिसोर्ट लगेर राखेको जनाइएको छ । जसपा उपेन्द्र यादव र बाबुराम भट्टराई पक्षले प्रतिनिधि सभाको बैठकमा प्रधानमन्त्री केपी शर्मा ओलीको विपक्षमा मत दिएका थिए भने ठाकुर र महतो पक्ष तटस्थ रहेको थियो ।

प्रधानमन्त्री केपी शर्मा ओली पदमुक्त भएपछि राष्ट्रपति विद्यादेवी भण्डारीले दलहरुलाई बहुमतको सरकार गठनका लागि आज बेलुका ९ बजेसम्मको समय दिएकी थिइन् ।

उक्त रिसोर्टमा ठाकुर र महतो पक्षका १९ जना सांसद रहेको बताइएको छ । सांसदको संख्या अझै बढ्ने र उपेन्द्र पक्षलाई अर्को दल दर्ता गर्न ४० प्रतिशत पुग्न नदिने प्रयास भइरहेको जनाइएको छ । जसपामा हाल ३२ सांसद रहेकोमा ठाकुर पक्षमा १९ सांसद देखिएका छन् ।