काठमाडौं । सत्तारुढ दल नेकपा (एमाले) भित्र देखिएको विवाद समाधानको सुत्र पहिल्याउने उद्देश्यका साथ सिंहदरबारमा बसेको दुई पक्षीय बैठक भर्खरै सकिएको छ ।

झण्डै तीन घन्टा प्रधानमन्त्री तथा मन्त्रिपरिषद्काे कार्यालयमा बसेको बैठकमा दुई पक्षबीच ठोस सहमति हुन सकेन् । पार्टी अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार नेपाल पक्ष फेरि छलफलमा जुट्ने गरी छुट्टिएका छन् ।

‘हामीले हाम्रो पार्टीको एकतालाई कायम राख्दै पार्टीलाई अगाडि बढाउन गम्भीरताका साथ कुराकानी गर्यौं’, बैठकमा सहभागी नेपाल पक्षीय नेता भीमबहादुर रावलले भने, ‘त्यसका लागि २०७५ जेठ २ गते अगाडिको पार्टी संरचनालाई आधार मानेर छलफल अगाडि बढाउने कुराकानी भयो ।’

पार्टीको संरचनालाई कुन मितिदेखि आरम्भ मान्ने भन्ने विषयमा देखिएको विवाद अन्त्यका लागि कार्यदल बनाउने र कार्यदलमा रहने सदस्यको नाम अध्यक्ष ओली र वरिष्ठ नेता नेपालले पेश गर्ने सहमति भएको रावलले बताए ।

दुवै पक्षबीच संवादलाई पुनः निरन्तरता दिने विषयमा सहमति भएको उनले बताए । नेपाल पक्षीय नेताले बैठकका बारेमा प्रतिक्रिया दिएको भए पनि ओली पक्षका नेताले कुनै प्रतिक्रिया दिएनन् ।

वार्तामै सहभागी एमाले नेता रघुजी पन्तले सौहार्दपूर्ण वातावरणमा छलफल भएको प्रक्रिया दिए । ‘पार्टीलाई एकताबद्ध बनाउने विषयमा छलफल भयो’, उनले भने ।

वार्तामा ओलीसहित उनी पक्षका नेताहरू ईश्वर पोखरेल, रामबहादुर थापा, विष्णु पाैडेल, सुवास नेम्वाङ र शंकर पोखरेल सहभागी थिए । यस्तै नेता नेपालसहित भीम रावल, सुरेन्द्र पाण्डे, घनश्याम भुसाल, गोकर्ण विष्ट र रघुजी पन्त सहभागी थिए।