काठमाडौँ । जनता समाजवादी पार्टी (जसपा)को उपेन्द्र यादव र डा. बाबुराम भट्टराई पक्षले औपचारिक बैठक नबसी प्रक्रिया बेगर संसदीय दलको नेता चयन गर्न नमिल्ने बताएको छ । सो समूहको कार्यकारिणी परिषद्को बैठकले नयाँ संसदीय दलको नेता चयनको विषय अमान्य भएको पनि बताएको छ ।

पार्टी कार्यालय बालकुमारीमा बसेको समूहको कार्यकारिणी परिषदको अनौपचारिक बैठकले वरिष्ठ नेता राजेन्द्र महतोलाई संसदीय दलको चयन गरेको विषयमा औपचारिक जानकारी नभएको र आफूहरूलाई मान्य नभएको बैठकपछि जसपा संघीय परिषद् अध्यक्ष डा भट्टराईले बताए । संसदीय दलको विधानको प्रक्रिया पूरा नभएको र पारित पनि नभएको अवस्थामा दलको नेता चयन गर्न नमिल्ने भट्टराईले बताए ।

नेता चयनबारेमा दुवै पक्षले सहमति गर्नुपर्ने अहिलेको व्यवस्था रहेको उनले बताए । यस विषयमा छिट्टै कार्यकारिणी बैठक बसेर छलफल गरिने भट्टराईको भनाइ थियो ।

जसपा अध्यक्ष महन्थ ठाकुर र वरिष्ठ नेता राजेन्द्र महतो पक्षधर सांसदहरूले बिहीबार महतोलाई संसदीय दलको नेता चयन गरेको सार्वजनिक भएको थियो । संसदीय दलको नेता चयनमा २० जना सांसदको सहमति रहेको ठाकुर–महतो पक्षको दाबी छ ।