काठमाडौँ । हेटौंडा उपमहानगरपालिका १ बाट ना।२ ख ९८६२ नम्बरको ट्रकमा लैजाँदै गरको एक क्विन्टल अवैध लागू औषध गाँजासहित ३ जनालाई प्रहरीले पक्राउ गरेको छ । उनीहरूलाई सोमबार प्रहरीले पक्राउ गरी आज सार्वजनिक गरेको हो ।

पक्राउ पर्नेमा काभ्रेको महाभारत गाउँपालिका ५ बस्ने ४९ वर्षीय आइते बहादुर ठाडामगर, मकवानपुर भिमफेदी गाउँपालिका ९ बस्ने ४१ वर्षीय ऐक्ला भन्ने राज कुमार तामाङ र कैलाश गाउँपालिका १० बस्ने ३६ वर्षीय सविन भन्ने सुबिन रुम्बा रहेका छन् ।

नामटारबाट हेटौंडातर्फ जाँदै गरेको उक्त ट्रकलाई जिल्ला प्रहरी कार्यालय मकवानपुरबाट खटिएको प्रहरीले जाँच गर्ने क्रममा ट्रकको हुटमा फल्स बनाई १७ वटा पोकामा गाँजा लुकाएर ल्याएको फेला परेको हो । प्रहरीले सुरूमा ट्रक र चालक मगरलाई पक्राउ गरेको थियो ।

पछि प्रारम्भिक अनुसन्धानको क्रममा गाँजा ओसार पसारमा संलग्न राज कुमार र सुबिनलाई समेत भिमफेदी नगरपालिका १ बाट पक्राउ गरेको हो । यस सम्बन्धमा थप अनुसन्धान भइरहेको जिल्ला प्रहरी कार्यालय मकवानपुरले जनाएको छ ।