काठमाडौं । काठमाडौं उपत्यकामै कोरोना संक्रमितको संख्या अध्याधिक बढ्न थालेको र नेपालमा ‘भारतीय भेरियन्ट’को कोरोना भाइरस फैलिएको पुष्टि भएको बेला काठमाडौं महानगरपालिकाले भीडभाड बढी हुने स्थानमा एन्टिजेन परीक्षण शुरु गरेको छ ।

कोभिडको सङ्क्रमण अवस्था पहिचान गरेर महामारी नियन्त्रण गर्न कामपा र इपिडिमियोलोजी तथा रोग नियन्त्रण महाशाखाले संयुक्तरूपमा एन्टिजेन परीक्षण थालेका हुन् । मङ्गलबार कालीमाटी तरकारी बजारमा एन्टिजन परीक्षण गरेको महानगरपालिकाले आज टुकुचाको तरकारी बजारमा परीक्षण गर्ने योजना बनाएको छ ।

काठमाडौं उपत्यकाभित्रै १० हजार जनामा एन्टिजेन परीक्षण गर्ने तयारी छ ।

स्वास्थ्य मन्त्रालय र सीसीएमसीले पहिचान गरेका उच्च सङ्क्रमणको सम्भावना रहेका स्थानहरुमा यस्तो परीक्षण शुरु गरिएको हो । धेरै सङ्क्रमित भएका काठमाडौंको असन, डिल्लीबजार न्युरोड, बालुवाटार र कोटेश्वरमा परीक्षण गरिने भएको छ । त्यस्तै, भक्तपुरको भक्तपुर दरबार स्क्वायर, ललितपुरको पाटन दरबार स्क्वायरलगायतका स्थानमा सम्बन्धित स्थानीय तहको सहकार्यमा एन्टिजेन परीक्षण हुन लागेको छ ।
हिजो कालीमाटीको तरकारी बजारमा गरेको एन्टिजेन परीक्षण ४०२ जनामा गर्दा १२ जनामा कोभिड पोजिटिभ देखिएको काठमाडौं महानगरपालिकाले जनाएको छ ।

कामपा स्वास्थ्य महाशाखा प्रमुख हरि कुँवरका अनुसार, परीक्षणबाट आएको नतिजाले लक्षणसहितका बिरामीलाई अस्पताल पठाउन र लक्षण नभएका बिरामीलाई होम आइसोलेशनमा बस्न तथा निगरानी गर्न सहज हुने गरी एन्टिजेन परीक्षण शुरु गरिएको हो ।

उनका अनुसार महानगरले पिसिआर विधिबाट पनि परीक्षणलाई तीव्र बनाएको छ । गत शनिबारसम्म स्वाब सङ्कलनका लागि पाँच वटा केन्द्र बनाएर काम गरिरहेको कामपाले हरेक दिन सङ्क्रमितको सङ्ख्या बढ्दै गहेकाले आइतबारदेखि १६ वटा स्थल तोकेर परीक्षणलाई तीव्र बनाएको कुंबरले जानकारी दिए ।

कामपाको ३२ वडाबाट मात्रै अहिले हरेक दिन ६०० जनाको परीक्षण हुने गरेको र परीक्षण गरिएकामध्ये ४२० जनामा पुष्टि हुने गरेको कामपा जनस्वास्थ्य महाशाखाले जनाएको छ ।