काठमाडौँ । सभामुख अग्निप्रसाद सापकोटाले पूर्व सभामुखहरूसँग बैठक बसेका छन् । संसद भवन नयाँ भानेश्वरमा बसेको बैठकमा पूर्व सभामुखहरू रामचन्द्र पौडेल, तारानाथ रानाभाट, कृष्णबहादुर महरा र ओमसरी घर्ती मगर सहभागी भएका छन् ।

बैठकमा पूर्व सभामुख रानाभाट भर्चुअल माध्यमबाट बैठकमा सहभागी भएका थिए । यस्तै पूर्व सभामुखहरू दमननाथ ढुंगाना र सुवास नेम्वाङ भने उपस्थित भएनन् ।

पूर्व सभामुखहरूले प्रधानमन्त्री केपी शर्मा ओली संसदप्रति अनुदार रहेको निष्कर्ष निकालेको छ । ओली संसद्प्रति इतिहासमा नै अनुदार प्रधानमन्त्री भएको टिप्पणी गरेका हुन् ।

कोरोना महामारी रोक्न सरकारले अन्य दलहरूसँग समन्वय गर्नु पर्नेमा चुनावको घोषणा गरेर अलोकतान्त्रिक चरित्र देखाएको उनीहरूको टिप्पणी छ । आन्दोलन र संघर्षबाट प्राप्त व्यवस्था तहसनहस पार्न लागेकाले त्यसलाई जोगाउनु अहिलेको मुख्य कार्यभार रहेको पूर्व सभामुखहरुको भनाई छ ।

सभामुख र पूर्व सभामुखहरूको बैठकको कुनै औचित्य नभएकाले आफू अनुपस्थित भएको पूर्व सभामुख सुवासचन्द्र नेम्वाङले बताएका छन् । उनले भने, ‘त्यो बैठकको कुनै अर्थ छैन, त्यसैले म गइनँ ।’

यसअघि सापकोटाले प्रतिनिधिसभाको विघटनसँगै कानुन व्यवसायी र राजनीति दलका शीर्ष नेतासँग छलफल गरेका थिए ।

सापकोटाले पहिलोपटक पुस ५ गते प्रतिनिधि सभाको विघटन हुँदा यसैगरी छलफल गरेका थिए । उनले प्रतिनिधिसभाको विघटनको विरोध गर्दै आएका छन् ।